1 Korintios 16 - Nuevo Testamento Romané 2007

So si dino

¹ Akana ka dau tumenge orba katar so si dino, te pomozin e llenen kai si katar o foro e Devleko, cherenle gia sar sikadem e kkanlliren kai si ande ppuv e Galasiaki.

² Suako kurko, suako lleno tumendar morabi te ttovel pe iek rig nesave love katar so dobisarda ta te guruvel len, gia ni ka chidenlen kana me ka llau te dikkau tumen.

³ Ta kana me ka avau ka bichalau ando Jerusalem e llenen kai tumen ka esvirin, ta ka dau len lila te sai inllaren e love kai tumen chidien.

⁴ A te si te llau i me, von ka llan manchar.

O Pablo ta savo drom ka istarel

⁵ Kana ka llautar morabi te nakkau katar e ppuv katar e Masedonia ta ka llau ando Korinto,

⁶ kote sai ka achau tumenchar nesavo vreme, sai avelpe kai ka nakkau o viend. Ondaka tumen ka pomozin man lovenchar te llau ande aver forura.

⁷ Ni kamam te dikkau tumen samo kana ka nakkau tumende; me aduricharau, te mangela o Gazda, te avau tumenchar mai but vreme.

⁸ Me ka achau ando Efeso llik o llive katar o Pentekostes,

⁹ soke putardile mange sa e udara te sai cherau e buchi, i kana si but llene kai si lenge joli pe ma.

¹⁰ Te avilo o Timoteo, cheren te avel leke drago te avel maskar tumende, soke vou radil ande buchi e Gazdaki sargo me

¹¹ goleke na ttoven le pe iek rig; mai sukar pomozin le te tradel drom ta te avel esmiro te dikkel man, soke me aduricharau le ogole pplalenchar.

¹² A cheres o pplal o Apolo, me but molisailem leke te llal te dikkel tumen e pplalenchar ta llik akana vou ni kamla, vou ka llal tumende kana sai ka cherel le.

Sikavel len so te cheren

¹³ Achen llungade ta zurale ando pachape ta te aven tromane.

¹⁴ Ta sogo cherena, cheren le volimaia.

¹⁵ Pplalalen, tumen llanen kai e familia katar o Estefanas saia kai mai anglal ande ppuv katar e Akalla lie e lachi viasta, ta von ttodepe te radin ta te pomozin e pplalen ando pachape.

¹⁶ Me mangau te cheren so von ka ppenen tumenge ta te ttoven tumen tala e va e llenenge kai radin e Devleke sargo von.

¹⁷ Veseliu man kai avilo o Estefanas, o Fortunato ta o Akaiko, soke kana ni sena tumen

¹⁸ von veselisarde man sargo i tumen. Ttoven sama e llenenge kai si sargo von.

Salami

¹⁹ E kkanllira ande Asia bichalen tumenge salami. O Akila ta o Priska ta e kkanlliri kai chidiniaon ande leko cher, bichalel tumenge but salami ando anau e Gazdako.

²⁰ Len o salami katar sa e pplal, ta den tumen iek chumidipe santo.

²¹ Me, o Pablo, pisiu tumenge gava salami isto me vastea.

²² Vareko te na volila e Gazda o Jesukristo, ¡e armaia e Devleke te peren pe lete! ¡O Gazda o Jesukristo avel!

²³ O Gazda o Jesukristo te ttovel pe tumende po volipe.

²⁴ Me voliu sa tumen ando volipe amare Gazdako o Jesukristo.