1 Korintios 15 - Nuevo Testamento Romané 2007

O Kristo ustilo katar o meripe

¹ Akana pplalalen, den tumen golli katar e lachi viasta kai sikadem tumen. Gaia si e lachi viasta kai tumen lien, ta cheres late sen zurale ando pachape.

² Ta cheres gaia lachi viasta tumen ka aven braduime te pachana zurale, isto gia sar me sikaden tumen; a te na cherenale, samo gia pachaien.

³ So mai anglal sikaden tumen si isto so me sikilem, kai o Kristo mulo pala amaro bilachipe, isto gia sar ppenel o Pisipe;

⁴ kai prajosarde le ta kai pala e trin llive ustilo katar o meripe, gia sar ppenel o Pisipe;

⁵ ta kai sikadilo e Sefaseke, ta mai angle sikadilo e desuduie apostolenge.

⁶ Ta mapalal sikadilo mai but katar e panlle stotine pplalenge ande iek drom, ta gola llene zivin llik akana, a nesave lendar mule.

⁷ Ta mapalal sikadilo e Santiagoke, ta mai angle sa e apostolenge.

⁸ Ta mai palal sikadilo mange kai sem sargo iek minono kai ni biandilo ande pe chona.

⁹ Me sem o mai minono katar e apostolura ta ni sem lacho ni te ikkaren man apostol, soke me cherdem te nakkel bari patnia e kkanlliri e Devleki.

¹⁰ A sem so sem soke o Del si lacho manchar; ta leko volipe manchar ni avila samo gia. Soke me radisardem mai but neko sa ogola; a o chachipe ni sema me, o Del saia kai ande po volipe pomozisarda man te cherau gala ezgode.

¹¹ Te sem me o von so sikadam, si isto so tumen pachaien.

I amen ka usta katar o meripe

¹² A amen te ppendam kai o Kristo ustilo katar o meripe, ¿soke nesave tumendar ppenen kai e mule ni ka usten katar o meripe?

¹³ Soke te na ustena e mule, ondaka ni o Kristo ni ustiloia katar o meripe;

¹⁴ a o Kristo te na ustilo katar o meripe, ondaka e lachi viasta kai ppendam tumenge ni moldaia la niso ta ni tumaro pachape kai si tumen.

¹⁵ Te avilaiape gia, amen ppendama iek kojaipe katar o Del, soke amen ppena kai vou vazdia e Kristo katar o meripe; gua ni avilaia gia te na ustilea e mule.

¹⁶ Soke e mule te na usten katar o meripe, ondaka ni o Kristo ni ustiloia katar o meripe;

¹⁷ A o Kristo te na ustiloia katar o meripe, tumaro pachape ni moldaia le niso ta tumen llik akana avilena ande tumaro bilachipe.

¹⁸ Ondaka i e llene kai mule ando pachape ando Kristo si jasarde.

¹⁹ Te aduricharaia o Kristo te pomozil amen samo ande gava zivoto, avaia o mai baro zao maskar e llene.

²⁰ A o chachipe si kai o Kristo ustilo katar o meripe; ta vou si o mai angluno katar e septelie kai chidiniaon soke si o purvo kai ustilo katar o meripe.

²¹ Gia sar avilo o meripe cheres iek lleno, i gia cheres iek lleno ka usten e mule katar o meripe.

²² Gia sar ando Adan sa meren, isto gia ando Kristo saurre ka avel len o zivoto.

²³ A suako lleno ka ustel katar o meripe ando vreme kai die le; mai anglal o Kristo, ta kana o Kristo ka avel, ka usten katar o meripe gola kai pachaie ande lete.

²⁴ Ondaka ka avel o son katar e ppuv kana o Kristo ka dobil sa e charoine ta suako zor, ta ka del e charoina e Devle, kai si o Dad.

²⁵ Soke o Kristo trubul te charoil llik kana sa leke dusmanura ka achen ttode telal tala leke porrne;

²⁶ ta o mai paluno dusmano kai o Kristo ka dobil si o meripe.

²⁷ Soke o Del ppenel kai sa ttoda tala e porrne e Kristoke. A kana ppenel kai sa si ande leke va, llangliolpe kai ande gala orbe inai ttodo o Del, soke isto o Del si kai ttoda sa tala e va e Kristoke.

²⁸ Ta kana sa ka avel tala e va e Kristoke, ondaka isto o Kristo, kai si o Chavo, ka ttovelpe tala e va e Devleke, soke o Del si kai dia ande leke va sa e ezgode ta gia o Del ka avel sa ande sa.

²⁹ Nesave kristinpe ando ttan iekke lleneko kai mulo. A te si de istina kai e mule ni ka usten katar o meripe, ¿soke te kristinpe pala lende?

³⁰ ¿Ta pala so ttova amen suako drom amaro zivoto po meripe?

³¹ Pplalalen, suako llive mo zivoto si po meripe; ta gava si o chachipe sargo o baripe kai cherau pala tumende.

³² Ando Efeso mardem man e llenenchar kai sea dive sargo zivirinie. A te avela chachipe kai e mule ni ka usten katar o meripe, ¿So dobisardem golea? te si gia, chera sar ppenen nesave llene: “¡Ja ta pia, kai ttiara ka mera!”

³³ Na muken te kojaven tumen, sar vareko ppenda: “E bilache llenenchar kai lla murin e lache ezgode kai sikilan.”

³⁴ Irin tumen pale kai o drom o chacho ta na cheren ios o bilachipe, soke nesave tumendar ni pinllaren e Devle. Ppenau gala ezgode te sai avel tumenge lallao.

Sar ka usten e mule katar o meripe

³⁵ Sai avelpe kai vareko sai puchel: “¿Sar ka usten e mule katar o meripe? ¿Sar ka avel lengi esnaga?”

³⁶ ¡Savo dilipe puchen! te sai bariol iek patrin e simicha morabi te merel te sai avel zivoto e patrina;

³⁷ so ttodolpe ande ppuv inai e patrin kai si te likel, so ttodol pe ppuv si e simicha katar o lliu kai si te bariol o katar varesavi aver simicha.

³⁸ Ta o Del mai angle cherel la te dikkol sar vou mangel, ta suako simicha del la e esnaga kai si te avel la.

³⁹ Na sa e esnage si sargo iek; iek si e esnaga e manuseki, ta aver si e esnaga e ziviriniengi, aver si e chirikliengi, ta aver si e machengi.

⁴⁰ Ta isto gia si e esnage kai si ando miloso, ta esnage kai si pe ppuv, ta suako iek si la lako sukaripe.

⁴¹ Sar klichil o kkam inai isto gia sar klichil o chon o e cheraia; ta i maskar e cheraia ni klichin sa sargo iek.

⁴² Isto gia si kana ka usten e mule katar o meripe. So prajolpe ande ppuv si so murilpe; a so ka ustel katar o meripe ni ka murilpe nikada.

⁴³ So prajolpe si iek esnaga muli; a so ka ustel katar o meripe si iek esnaga blagosime.

⁴⁴ So prajolpe si iek esnaga e ppuviaki; a so ka ustel katar o meripe si iek esnaga duoki. Te si iek esnaga ppuviaki, si i iek esnaga duoki.

⁴⁵ Gia ppenel o Pisipe: “O Del cherda e muruse, o Adan, ta vou saia o purvo manus kai saia le zivoto;” a o Kristo, kai si o nevo Adan, cherdilo duo kai del zivoto.

⁴⁶ Goleke, mai anglal saia e esnaga ta mapalal o duo.

⁴⁷ O purvo manus, saia cherdo katar e ppuv ta saia e ppuviako; a o duito manus si e milosoko.

⁴⁸ Sa e manusa kai zivin pe ppuv si len iek esnaga sargo e Adaneki, kai saia cherdo e ppuviatar. A sa gola kai zivin ando miloso si len iek esnaga sargo e Kristoki.

⁴⁹ Goleke, gia sar dikkiva sargo o manus kai saia cherdo e ppuviatar, isto gia ka dikkiva sargo gua kai avilo katar o miloso.

⁵⁰ Pplalen mangau te ppenau tumenge, kai sa so si e ppuviako nasti avel ande charoina e Devleki, ta so murilpe nasti avel kote kai nikada ni ka murilpe niso.

⁵¹ Me mangau te llanen e volia gurudini e Devleki: Na sa ka mera, saurre ka ava pparrudine.

⁵² Ande iek vreme, gia sar putaol ta ppangliol e iak, ande mai paluni taturuga; soke ka basel e taturuga, ta e mule ka usten katar o meripe ta nikada ios ni ka meren ta amen ka ava pparrudine.

⁵³ O Del ka pparruvel gala esnage amare, kai meren ta murinpe, pe esnage kai ka zivin ostade ta nikada ni ka meren.

⁵⁴ Kana ka nakken gala ezgode amenchar, ka cherdol so ppenel o Pisipe: “¡O meripe ka avel zatrime!

⁵⁵ Meripe, ia ni dobi ios. Ia Inai tut ios zor te dukkave amen”

⁵⁶ Soke e duk e merimaki si o bilachipe, a e zor e bilachimaki bariol cheres o zakono e Moiseseko.

⁵⁷ ¡A fala e Devleke kai cherel amen te dobi ande amaro Gazda o Jesukristo!

⁵⁸ Goleke, pplalalen kai voliu tumen, llan zoriaia ta radi suako drom mai but ta mai but e Gazdake, ta llanen kai sa so radin e Devleke inai samo gia.