1 Korintios 14 - Nuevo Testamento Romané 2007

¹ Roden te avel tumen volipe, ta mangen katar o Santo Duo te del tumen mai anglal te anen porouka e Devleki.

² Ko del orba ande aver chibia, del orba e Devlea ta na e manusenchar, soke niko ni acharel leke. Ande po duo ppenel ezgode gurudine ta niko ni acharel len.

³ A ko anel e porouka e Devleki, bariavel o pachape e llenengo soke acharen leke ta len zor.

⁴ Ko del orba ande aver chibia, cherel le te bariavel piro pachape, a ko anel e porouka e Devleki, bariavel o pachape e kkanllirako.

⁵ Me manglema sa tumen te diena orba ande aver chibia; a avilaia mange mai drago te diena orba cheres e porouka e Devleki, soke gaia ezgoda si mai preche neko te den orbe ande aver chibia, te na avela vareko te ppenel so ppenda o gua lleno kai dia orba ande aver chibia, ta gia e kkanlliri te bariol ando pachape.

⁶ Pplalalen, mai preche avela te ppenau tumenge so sikavel amen o Del ta te sikiva katar o chachipe, te dau tumenge orba katar e porouka e Devleki ta te dau tumenge orba katar varesavo sikadipe; soke ni blazila tumenge niso te llau te dikkau tumen ta te dau tumenchar orba ande aver chibia.

⁷ E ezgode kai basaldon sargo o firo o e arpa, ni basen sargo iek, soke te avelape gia ni achardola sar asundol suako iek.

⁸ A e taturuga te na basalela bristo kana si o maripe, niko ni lacharelape te marelpe.

⁹ Isto gia si tumenchar, soke kana tumen den orba alavenchar kai nasti achardon ¿sar ka llangliolpe so tumen ppenen? ¡Gava si sargo te den orba e balaviake!

¹⁰ Ni llanau pe gachin chibia si pe ppuv, ta suako chib si la lake alava.

¹¹ A me te na pinllarava gola alava, me ka avau gole lleneke kai del orba manchar sargo avere ppuviengo, ta i vou mange ka avel sargo avere ppuviengo.

¹² Goleke, soke tumen pe gachin mangen e bucha e Duoke, roden mai anglal gola bucha kai mai bariaven o pachape e kkanllirako.

¹³ Goleke, ko del orba ande aver chibia morabi te mangel e Devletar te ppenel so si gola alava kai dia orba te sai acharenle i ogola llene.

¹⁴ Soke me te moliuman ande aver chib, si de istina kai moliuman me duoia, a mo achardipe achel mulo.

¹⁵ Goleke, ¿so morabi te cherau? morabi te moliuman e duoia ta i me achardimaia. Morabi te llilabau e duoia ta i me achardimaia.

¹⁶ Soke tu te blagosi e Devle samo e duoia, ta varesavo lleno te asunela tut, nasti ka molilpe tuia ta te ppenel: gia te avelpe, soke ni ka acharel niso.

¹⁷ Tu sar dian fala sai cherdanle but sukar, a gua lleno kai asunda tut, ni ka pomozil le ande niso.

¹⁸ Dau fala e Devle soke dau orba ande aver chibia mai but neko sa tumen;

¹⁹ a kana sem ande kkanlliri mange si mai lache te ppenau panch alava te acharen len, ta gia te sikavau averen, neko te ppenau des milie alava ande aver chibia.

²⁰ Pplalalen, na mislin tumen sargo minone, mai sukar si te aven sargo minone ando bilachipe a bare ande tumaro mislo.

²¹ Ando Pisipe ppenel: “Ka dau orba gale ppuviake ande aver chibia kai ni pinllaren ta katar o mui e llenengo kai si katar aver ppuv, ta ni gia ni ka ttoven mange sama ppenel o Gazda”

²² Goleke e chibia si te dikkol iek ezgoda e llenenge kai ni pachan, inai golenge kai si len pachape. A e porouka e Devleki si e llenenge kai si len pachape, na golenge kai ni pachan.

²³ A te avelape kai sa e llene katar e kkanlliri chidiniaon ande iek ttan, ta sa den orba ande chibia, ta del vareko kai ni acharel o inai le pachape, vou ka mislilpe kai tumen dilailen.

²⁴ A saurre te dena orba katar e porouka e Devleki ta del iek lleno kai ni pachal o kai ni acharel, vou ka acharelpe kai si bilacho kana ka asunel gola alava kai si e Devleke.

²⁵ Ta gia ka putaol sa leko lio, ta ka blagosil changenchar e Devle ta ka pachal kai chachimaia o Del si tumenchar.

Morabi te avel liubao ande kkanlliri

²⁶ Pplalalen kana tumen ka chidiniaon, nesave sai llilaben, aver sai sikaven o sai ppenen so o Del sikada lenge, aver sai den orba ande aver chibia o sai ppenen so die orba ande gola chibia. Ta sa gala ezgode morabi te cherdon te bariardol iek avere.

²⁷ Kana ka den orba ande aver chibia morabi te cherenle dui o trin llene, ta te cherenle iek po iek, ta morabi te avel vareko te ppenel so ppende ande gola chibia kai die orba.

²⁸ A te na avela niko ande kkanlliri te ppenel so ppenen ande gola chibia kai die orba, gola llene morabi te achen ta te den orba samo von peke ta e Devleke.

²⁹ Isto gia te avena poraukura, morabi te den orba dui o trin, a ogola morabi te ttoven sama ta te mislinpe so ppendilo.

³⁰ A o Del te sikavela vareso iekke llene kai si besindo kote, ondaka o gua kai dela orba mai anglal morabi te achel.

³¹ Gia iek po iek ka ppenen so o Del ppenda lenge, te gia saurre ka sikon ta ka barion ando pachape.

³² E poraukura morabi te llanen kana si te ppenen e porouka e Devleki ta kana morabi te na den orba,

³³ soke o Del si o Del katar e pas na katar e burkania. Soke gia sar si sikade te cheren ande sa e kkanllira,

³⁴ e diskinie morabi te na den orba kana chidiniaon ande kkanlliri, soke inai dino lenge te den orba ande kkanlliri. Von morabi te aven tala o va pe romengo, gia sar ppenel ando zakono.

³⁵ A te mangena te sikon vareso, te puchen pe romen ande pe chera; soke inai sukar iek diskinia te del orba ande kkanlliri.

³⁶ Tumen ni cherden e alava e Devleke, ta ni sen tumen e edine llene kai lien len.

³⁷ Vareko te mislilape kai si porauko, o pachala kai o Santo Duo cherel buchi lea, ka pinllarel kai e alava kai pisiu tumenge si zakonura e Gazdake.

³⁸ A te na pinllarela e alava kai pisiu tumenge, ni o Gazda ni ka pinllarel le.

³⁹ Goleke pplalalen, morabi te aven zelne te len e porouka e Devleki, ta na achaven e llenen te den orba ande aver chibia;

⁴⁰ ta ande sa gala ezgode te avel liubao ta te cherenle sar trubulpe.