1 Korintios 13 - Nuevo Testamento Romané 2007

O chachuno volipe

¹ Te dava orba e chibia e manusenge ta i e suechonenge, ta te na avel man volipe, sen sargo iek sastri kai basel o iek sinbalo kai asundol.

² I te avela man dini e porouka te llanau so si te avelpe, ta te llanava sa e ezgode gurudine e Devleke ta sa o bizaipe, ta te avela man iek pachape gia baro kai sai miskou e burdura, ta te na avela man volipe, ni sem niso.

³ I te dava sa so si man te jan e llene kai si chorre, ta i te dava mi esnaga te ppabardol pala lende, ta te na avela man volipe, gua niso ni blazil mange.

⁴ Kana e manuse si le volipe suako ezgoda terpil ta si lacho; inai le joli, ni blagosil vou pe, ta ni cherel baripe ande pe,

⁵ ni ppenel bilache alava, inai lakomo ta ni achel joliariko averea;

⁶ ni veselilpe ando bilachipe, veselilpe ando chachipe.

⁷ Ka si le volipe sai prostil suako ezgoda, sa sai pachal, sa sai aduricharel, ta sa sai terpil.

⁸ O volipe nikada ni ka merel. Iek llive e porouka katar so si te avelpe ni ka avel ios, ta ni ka delpe orba ande aver chibia ta ni ka trubulpe o bizaipe.

⁹ Soke o bizaipe e porouka ta sa so llana akana, inai orta.

¹⁰ A kana ka avel so si orta, sa ogola ezgode ni ka aven ios.

¹¹ Kana sema minono, dava orba, misliva man ta acharava sargo iek minono; a kana barilem, muklem palpale e ezgode kai cheren e minone.

¹² Akana dikka katar e geldala ando truñariko; a iek llive ka dikka e Gazda angla amende. So pinllarau akana inai orta, a iek llive ka pinllarau e Devle gia sar vou pinllarel man.

¹³ Si trin ezgode kai nikada ni ka meren: O pachape, so adurichara ta o volipe; a o mai baro lendar si o volipe.