1 Korintios 10 - Nuevo Testamento Romané 2007

¹ Ni kamam pplalalen, te bristaren tumen kai amare purane sa sea telal tala gua oblako, ta saurre nakkle e Mora e Loli.

² Ta gia saurre achile kristime ande iek ttan e Moisesea kana sea kristime ando oblako ta e mora.

³ Ta isto gia saurre jale iek jape duoko kai o Del dia len.

⁴ Ta saurre pile isto gua pipe duoko. Soke piena pai katar o barr duoko kai llala lenchar kana ladena, ta gua barr kai llala lenchar saia o Kristo.

⁵ Ta isto gia but llene lendar ni avile drago e Devleke, ta goleke mule ta achile lenge esnage inzarde po pusto.

⁶ Sa gala ezgode nakkle te sai amen sikiva te na manga o bilachipe sar von manglele.

⁷ Goleke tumen na blagosin avere devlen sar cherdele nesave lendar, gia ppenel o Pisipe: “O sueto beslo te jal ta te piel, ta ttodepe te blagosin avere devlen chelimaia.”

⁸ Na da amen ando kurvaluko, sar cherdele nesave lendar, ta cheres gua ande iek llive mule bis ta trin milie llene.

⁹ Goleke na zumava e Kristo sar cherdele nesave lendar ta mule dandarde e sapendar.

¹⁰ Ta na den orbe bilache e Devleke, sar cherdele nesave lendar ta goleke o suecho e merimako mundarda len.

¹¹ Sa gala ezgode nakkle amare puranenge ta achilo pisime ando Pisipe, te sai sikiva amen kai zivi ande gava vreme mai paluno.

¹² Goleke, gua kai mislilpe kai si zuralo, te arakkelpe te na perel.

¹³ Tumen ni nakklen iek zumadipe gia baro kai nasti terpilpe. Ta tumen sai pachan ando Del, kai ni ka mukel tumen te nakken gia baro zumadipe kai tumen nasti ka terpin. Goleke, kana ka avel o zumadipe, o Del ka sikavel tumen te sai terpin o zumadipe ta te sai liken letar.

¹⁴ Goleke pplalalen kai voliu tumen, na blagosin avere devlen.

¹⁵ Tumen sen manusa bizai ta llanau kai acharen so ppenau.

¹⁶ Kana pia katar o taso kai si blagosime, lea blagosi e Devle, ta saurre la o rat e Kristoko; ta kana ja o marrno kai ppagla, saurre la e esnaga e Kristoki.

¹⁷ I te sam but llene, saurre ja katar iek marrno ta gia cherdiva iek esnaga.

¹⁸ Ttoven sama po foro katar o Israel kai jan katar o mas kai diele kurbano ta von ande iek ttan po altar jan e llenenchar kai mundaren o kurbano.

¹⁹ Galea ni kamam ppenau kai aver devla mol len vareso, ni kai o mas kai die gole devlen si mai but neko varesavo mas.

²⁰ So mangau te ppenau si kai kana e llene kai ni pachan ando Del den kurbano, denle e llavoloke, ta na e Devleke, ta me mangau te na avel tumen niso e llavolonenchar.

²¹ Nasti pien katar o taso e Gazdako ta i katar o taso e llavolonengo; ta nasti besen pe sinia e Gazdaki ta i pe sinia e llavolonengi.

²² ¿A so, mangen o Del te joliaol? ¿A so, sam amen mai zurale neko o Del?

Pomozin averen

²³ Nesave tumendar ppenen: “Me ni sem ppanglo me sai cherau so me mangau.” A but droma na sa so mangel o manus si lacho, ta na sa bariavel o pachape e manusengo.

²⁴ Niko te na rodel peke o lachipe, mai sukar si te rodel o lachipe averenge.

²⁵ Kana ka llan kote kai bichinen mas jan katar sa so bichinen ta na mislin tumen katar avel gua mas.

²⁶ Soke e Gazdaki si e ppuv ta sa so si ande late.

²⁷ Vareko kai ni pachal te ikkarela tumen te jan, ta tumen mangen llan, jan katar sa so ttovela tumenge, ta na brigin tumen dal sai jalpe o iok.

²⁸ A kana vareko te ppenela tumenge: “Gava mas diele kurbano avere devlenge”, ondaka te na jan, cheres o lleno kai ppendale ta cheres leko mislo.

²⁹ Dau orba cheres o mislo ogolengo, na cheres tumaro mislo.

³⁰ A me te dau fala e Devle cheres o jape ¿soke dosaren man kana dau fala pala gua jape?

³¹ Goleke te jana o te piena, o te cherena aver ezgoda, cherenle sa te blagosin e Devle.

³² Te na aven tumen e burkania e judionenge ta ni e llenenge kai inai judiura, ni golenge kai si katar e kkanlliri e Devleki.

³³ Me suako ezgoda kai cherau cheraula pala o lachipe saurrengo, ta ni rodau mange o lachipe; me rodau o lachipe avere llenenge te sai aven braduime.