1 Juan 5 - Nuevo Testamento Romané 2007

O pachape kai dobil e sueto

¹ Suako lleno kai pachal kai o Jesus si o Kristo, biando e Devletar si; a suako lleno kai volil po Dad i pe leke chave volil.

² Kana amen voli e Devle ta chera leki buchi, llana kai amen voli i e Devleke chave.

³ Soke gava si te voli e Devle, te chera leki buchi, ta inai trudno te cherale.

⁴ O chachipe si kai sogo si biando e Devletar, dobil e sueto. Ta amaro pachape cherda te dobil gava sueto.

⁵ Gua kai pachal kai o Jesus si e Devleko Chavo, dobil e sueto.

⁶ Kana o Jesukristo avilo pe gava sueto, avilo katar o pai ta o rat; na samo katar o pai, vou avilo katar o pai ta i o rat. O Duo ppenel gava, ta sogo ppenel o Duo si chachipe.

⁷ Soke trin ppenen kai gua si chachipe:

⁸ O Duo, o pai ta o rat. Gala trin ppenen isto gua.

⁹ Amen pacha ande so ppenen e llene, a so ppenel o Del si mai baro soke o Del ppenel katar leko Chavo.

¹⁰ Gua kai pachal ande Devleko Chavo inllarel o chachipe ande po lio; a o gua kai ni pachal, cherel e Devle sargo kojamno, soke ni pachal ande so ppenel o Del katar leko Chavo.

¹¹ A gava si so ppenel o Del amenge: Kai dia amen o zivoto ostade; ta gava zivoto si ande leko Chavo.

¹² Gole kai si le e Chave e Devleko, si le o zivoto ostade; a gole kai inai le e Chave e Devleko, inai le o zivoto ostade.

¹³ Me pisiu tumenge kai pachan ande Devleko Chavo te llanen kai si tumen o zivoto ostade.

¹⁴ Si amen vera ando Del, soke llana kai te mangla fiso prema so drago leke, vou asunel amen.

¹⁵ Ta isto gia sar amen llana kai vou asunel amaro molipe, i amen llana kai si amen so manglam letar.

¹⁶ Fiko te dikkel kai leko pplal cherel bilachipe kai ni inllarel po meripe, morabi te molilpe, ta o Del ka del zivoto e pplaleke; soke sai te avel bilachipe kai ni inllarel po meripe. Nesave bilachipe cheren e manuse te jasaol o zivoto ostade, a me ni ppenau kai pala gua bilachipe morabi te molilpe.

¹⁷ Suako ezgoda kai inai lachi si bilachipe; ta na suako bilachipe inllarel po meripe.

¹⁸ Amen llana kai suako lleno kai biandilo e Devletar, ni cherel bilachipe, soke Jesukristo, o Chavo e Devleko arakkel le ta o llavolo nasti dodisarel le.

¹⁹ Amen llana kai sam e Devletar ta sa o sueto si gazdarime e llavolotar.

²⁰ I amen llana kai o Chavo e Devleko avilo ta cherda te pinllara e Devle o chachuno; ta amen sam e Chavea o Jesukristo. Gava si o Del o chachuno ta o zivoto ostade.

²¹ Chavalen, arakken tumen katar dela kojamne. Amen.