1 Juan 4 - Nuevo Testamento Romané 2007

O chachuno pachape

¹ Pplalalen, na pachan tumen ande suako duo, goleke tumen morabi te dikken dal gala duura si e Devleke o iok; soke but poraukura kojamne likiste ando sueto.

² Gia sai ka llanen ko de istina si le e Devleko Duo: Suako duo kai ppenel kai o Jesukristo avilo sargo manus, gua si e Devleko,

³ o duo kai ppenel kai o Jesukristo ni avilo sargo manus, inai e Devleko; gua si o duo katar o antikristo kai tumen llanen kai si te avel, a vou si ando sueto.

⁴ Chavalen, tumen sen e Devleke ta dobisarden gole poraukonen kojamne, soke o gua kai si ande tumende si mai baro neko o llavolo.

⁵ Von si e suetoke; goleke den orba e suetotar ta o sueto asunel len.

⁶ A amen sam e Devleke; gua kai pinllarel e Devleko ni asunel amen; goleke cheres gala ezgode amen sai pinllara ko si le o Duo chachuno o ko sile o Duo kojamno.

O volipe ppenel kai o Del si amenchar

⁷ Pplalalen, si te voli amen soke o volipe avel e Devletar. Suako lleno kai volil si chavo e Devleko ta pinllarel e Devle.

⁸ A gua kai ni volil ni pinllarel e Devle soke o Del si volipe.

⁹ O Del sikada amenge po volipe kana bichalda pe Chave o edino, te sai amen zivi cheres lete.

¹⁰ Leko volipe si inai kai amen volisardam e Devle; o volipe si kai vou volisarda amen ta bichalda pe Chave ta cheres lete amaro bilachipe achel prostime.

¹¹ Pplalalen, te volisarda amen gia o Del, amen morabi te voli amen maskar amende.

¹² E Devle niko nikada dikkla le, a te voli amen maskar amende o Del si amenchar ta leko volipe ka achel amenchar.

¹³ Amen llana kai sam e Devlea ta kai vou si amenchar, soke dia amen po Duo.

¹⁴ Isto amen dikklam kai o Dad bichalda pe Chave te braduil e sueto.

¹⁵ Suako lleno kai ppenel kai o Jesus si e Devleko Chavo, o Del achel lea a vou e Devlea.

¹⁶ Goleke amen llana ta i pacha kai o Del volil amen. O Del si volipe, ta suako lleno kai volil pe pplalen si e Devlea a o Del lea.

¹⁷ Gia cherdol chachipe o volipe maskar amende, ta gia kana ka avel o llive e krisako, te avel amen vera; soke amen zivi sar zivisarda o Jesukristo pe gava sueto.

¹⁸ Ando volipe inai dar. O volipe cherel te duriol o dar. A te daral fiko kai o Del ka del le patnia, gua si kai ni sikilo te volil de istina.

¹⁹ Amen voli soke vou volisarda amen mai anglal.

²⁰ Suako lleno kai ppenel: “Me voliu e Devle” ta murzil pe po pplal, vou si kojamno. Soke te na volila pe pplale kai dikkel le, sar ka volil e Devle kai nasti dikkel le.

²¹ O Jesukristo dia amen gala alava: ko volil e Devle morabi te volil i pe pplale.