1 Juan 3 - Nuevo Testamento Romané 2007

¹ Dikken pe gachin volil amen o Dad kai ikkarel amen chave e Devleke, goleke o sueto ni pinllarel amen, soke o sueto ni pinllarda le.

² Pplalalen, akana amen sam chave e Devleke, ta ni ios ni sikadol sar ka ava amen, samo llana kai kana ka avel o Jesukristo ka ava sargo vou, soke ka dikka le sar si vou.

³ Suako lleno kai si le vera ande le, chistolpe isto vou pe, gia sargo o Jesukristo si chisto.

⁴ Suako lleno kai cherel bilachipe ni guruvel o zakono; soke o bilachipe si kana ni guruven o zakono.

⁵ A tumen llanen kai vou likisto te chistosarel amen katar o bilachipe, soke ande le inai bilachipe.

⁶ Suako lleno kai achel lea, ni cherel bilachipe; soke gua kai cherel bilachipe, ni dikkla le ta ni pinllarda le.

⁷ Chavalen, te na kojavel tumen niko; gua kai cherel o lachipe si lacho sargo vou kai si lacho;

⁸ a gua kai cherel o bilachipe si e llavoloko, soke o llavolo cherel o bilachipe sar kana o Del cherda e manusen. Goleke avilo o Chavo e Devleko te zatrisarel e llavoloki buchi.

⁹ Gua kai biandilo e Devletar ni cherel bilachipe, soke e vicha e Devleki achel lea ta nasti cherel bilachipe, soke biandilo e Devletar.

¹⁰ Llangliolpe ko si e chave e Devleke a ko si e chave e llavoloke, soke suako lleno kai ni cherel o lachipe ta ni volil pe pplale inai e Devleko.

¹¹ Gaia si e viasta kai tumen asunden mai anglal: Te avel volipe maskar amende.

¹² Na sargo o Kain kai saia bilacho ta mundarda pe pplale. ¿A soke mundarda le? Soke e bucha katar o Kain sea bilache, a e bucha katar leko pplal sea lache.

¹³ Pplalalen, na chudin tumen soke gola kai si katar o sueto murzin pe tumende.

¹⁴ Amen llana kai nakklam katar o meripe llik kai o zivoto soke voli amare pplalen. Gua kai ni volil pe pplale, achel ando meripe.

¹⁵ Suako lleno kai murzil pe po pplal si sargo iek lleno kai mundarel; a tumen llanen kai gua kai mundarel nasti lel o zivoto ostade.

¹⁶ Amen pinllara so si o volipe soke o Jesukristo dia po zivoto pala amende; i amen si te da amaro zivoto pala amare pplalen.

¹⁷ Soke fiko te avel barvalo ta dikkel kai leko pplal si chorro ta ni pomozil le, ¿sar ka avel ande le o volipe e Devleko?

¹⁸ Chavalen, te na avel amaro volipe samo alava, morabi te sikadol gua volipe katar so chera chachimaia.

¹⁹ Gia amen llana kai sam katar o chachipe, ta ande amaro lio ka avel vera angla o Del;

²⁰ soke te ppukavel amen amaro lio katar fiso, o Del si mai baro neko o lio ta llanel sa e ezgode.

²¹ Pplalalen, amaro lio te na dosarda amen, si amen vera ando Del;

²² ta vou ka del amen sogo ka manga letar soke amen kanda leke zakonura, ta chera so drago leke.

²³ A leki buchi si te pacha ande leko Chavo, o Jesukristo, ta te avel volipe maskar amende gia sar vou sikada amen.

²⁴ Gola kai kanden leke zakonura achen e Devlea a o Del achel lenchar. Goleke amen llana kai vou achel amenchar pala o Duo kai vou dia amen.