1 Juan 2 - Nuevo Testamento Romané 2007

¹ Chavalen, me pisiu tumenge gala ezgode te na cheren o bilachipe. A te avel iek tumendar kai cherda o bilachipe, si amen abogado angla o Dad, o Jesukristo o chacho.

² Vou si o kurbano pala amaro bilachipe; ta inai samo pala amaro bilachipe, vou si kurbano i pala sa o sueto.

E prokestia katar o volipe

³ Te gurudam amen e Devleke zakonura, ondaka ka llana kai de istina pinllara le.

⁴ A te ppenel vareko: “Me pinllarau le”, ta ni guruvel leke zakonura, gua si kojamno ta ande lete inai chachipe.

⁵ Goleke, gua kai cherel leki buchi ande lete de istina si e Devleko volipe; goleke amen llana kai sam lea.

⁶ Gua kai ppenel kai llal e Devlea, morabi te llal sargo llelo Jesukristo.

⁷ Pplalalen, gaia prokestia kai ppenau tumenge inai nevi; isto goia si kai saia tumen mai anglal; gaia prokestia purani si o alau kai tumen ia asunden.

⁸ A me pisiu tumenge iek prokestia nevi kai si chachuni ando Kristo ta i ande tumende, soke o truñariko nakkel ta akana kletosarel o villelo chachuno.

⁹ Te ppenel vareko kai si ando villelo ta murzil pe po pplal, gua lleno si ando truñariko.

¹⁰ Gua kai volil pe pplale llal ando villelo ta niso nasti peravel le.

¹¹ Ta o gua kai murzil pe po pplal, llal ando truñariko ta ni llanel kai llal, soke o truñariko korrada le.

O chachuno pachape

¹² Chavalen, pisiu tumenge soke o Del prostisarda tumaro bilachipe pala leko anau.

¹³ Dadalen, pisiu tumenge soke tumen llanen kai vou saia mai anglal. Pisiu tumenge e terne, te llanen kai dobisarde e llavolo.

¹⁴ Pisiu tumenge chavalen soke akana pinllaren e Dade. Pisiu tumenge, dada, soke akana pinllaren gole kai saia mai anglal. Ta pusiu i tumenge e ternenge, soke sen zurale ta e Devleke alava si ande tumaro lio ta i soke dobisarden e llavolo.

¹⁵ Na volisaren e sueto ta niso so si ande le. Vareko te volil e sueto, e Devleko volipe inai ande lete.

¹⁶ Soke sogo si ando sueto, o kurvaluko e mislura bilache o istardipe, ni aven e Dedetar, aven katar o sueto.

¹⁷ A o sueto nakkel ta sa leke mislura bilache; a gua kai cherel e Devleki buchi achel ostade.

¹⁸ Chavalen, gava si o son e vremeko; sar tumen asunden o antikristo si te avel, ta akana likiste but antikristura goleke amen llana kai si o gotovo e vremeko.

¹⁹ Likiste amendar, a ni sea amarendar, soke te avilea amarendar achilea amenchar; a likiste amendar te llangliolpe kai inai saurre amarendar.

²⁰ O Santo ttoda pe tumende o Duo ta llanen sa e ezgode.

²¹ Me pisiu tumenge inai soke ni pinllaren o chachipe, tumen llanen o chachipe; ta ni iek kojaipe nasti avel katar o chachipe.

²² ¿Ko si kojamno? o kojamno si gua kai ppenel kai o Jesus inai o Kristo. Gava si o antikristo soke ppenel kai ni pinllarel e Dade ta ni e Chave.

²³ Fiko te ppenel kai ni pinllarel e Chave, inai le e Dade; a gua kai ppenel kai pinllarel e Chave, i e Dade si le.

²⁴ Goleke tumen guruven ande tumaro lio so asunden mai anglal, soke te asunden le ta te guruvenle; o Chavo ta i o Dad ka achen tumenchar.

²⁵ Gava si o alau kai dia amen o Jesukristo: O zivoto ostade.

²⁶ Me pisiu tumenge cheres gola llene kai mangen te kojaven tumen.

²⁷ A pe tumende si o Santo Duo kai o Jesukristo bichalda tumenge, ta ni trubul tumen niko te sikavel tumen soke o Duo kai vou dia tumen sikavel tumen katar suako ezgoda ta so sikavel si o chachipe na o kojaipe goleke achen ande iek ttan e Jesusea.

²⁸ Akana chavalen, achen e Kristoia, te sai avel amen vera kana vou ka sikadol ta te na jan lallao angla le kana vou ka avel.

O mukliardipe katar o bilachipe

²⁹ Tumen llanen kai o Jesukristo si lacho goleke tumen morabi te llanen kai gola kai cheren o lachipe, gola si chave e Devleke.