1 Juan 1 - Nuevo Testamento Romané 2007

O alau katar o zivoto

¹ So saia mai anglal, so asundam, so dikkle amare akka ta so dodisarde amare va katar o Alau zivotoko.

² Soke o zivoto avilo te sai dikkol, ta amen dikklam le, ta ppena tumenge gava zivoto ostade kai saia e Dadea, ta i kai avilo amenge te dikka le.

³ Goleke amen ppena tumenge so amen dikklam ta so amen asundam, te aven i tumen amenchar, sargo amen sam e Devlea o Dad ta leko Chavo, o Jesukristo.

⁴ Gala ezgode amen pisi len te avel amari veselia pperdi.

O Del si villelo

⁵ Gaia si e viasta kai o Jesukristo sikada amen, ta kai amen ppena tumenge: O Del si villelo ta ande lete inai truñariko.

⁶ A te ppena kai amen sam lea, a sam ando truñariko, gua si kojaipe soke ni chera o chachipe;

⁷ a te lla amen ando villelo, sargo o Del kai si ando villelo, ondaka maskar amende si volipe, ta o rat e Jesuseko leko Chavo, chistosarel amen katar sa o bilachipe kai amen chera.

⁸ A te ppena kai amen nikada ni chera o bilachipe, isto amen kojava ta o chachipe inai amenchar.

⁹ Te ppena e bilache ezgode kai amen chera, vou si lacho te chistosarel amen katar amaro bilachipe.

¹⁰ A te ppena kai amen nikada ni cherdam bilachipe, amen chera te achel o Del sargo kojamno, ta leke alava inai amenchar.