Zjaveňje 7 - Le Devleskero Lav Andre Romaňi Čhib Slovensko 2021

O manuša andral o Izrael zapečaťimen

¹ Paľis dikhľom štare aňjelen, sar ačhenas pro štar agora la phuvakre a chudenas la phuvakre balvaja, hoj te na phurdel e balvaj pre phuv, aňi pro moros, aňi pre ňisavo stromos.

² A dikhľom avre aňjelos, savo avelas upre pal o vichodos a saveste sas e pečať le džide Devleskri. Ov vičinelas zorale hangoha pro štar aňjela, savenge sas dino, hoj te dukhaven e phuv the o moros,

³ a phenďa lenge: „Ma dukhaven e phuv, aňi o moros, aňi o stromi, medik amen na daha e pečať pro čekata ole dženen, save služinen amare Devleske.“

⁴ Šunďom, keci džene sas zapečaťimen: 144 000 džene andral savore kmeňi andral o Izrael.

⁵ Andral o kmeňos le Judaskro dešuduj ezera (12 000) zapečaťimen, andral o kmeňos le Rubenoskro dešuduj ezera, andral o kmeňos le Gadoskro dešuduj ezera,

⁶ andral o kmeňos le Ašeroskro dešuduj ezera, andral o kmeňos le Naftaliskro dešuduj ezera, andral o kmeňos le Menašeskro dešuduj ezera,

⁷ andral o kmeňos le Simeonoskro dešuduj ezera, andral o kmeňos le Leviskro dešuduj ezera, andral o kmeňos le Jisacharoskro dešuduj ezera,

⁸ andral o kmeňos le Zebulunoskro dešuduj ezera, andral o kmeňos le Jozefoskro dešuduj ezera, andral o kmeňos le Benjaminoskro dešuduj ezera zapečaťimen.

Igen but manuša anglo tronos

⁹ Paľis dikhľom a sas ode pherdo manuša, saven ňiko našťi zrachinelas, andral savore narodi, kmeňi, nipi the čhiba. Ola manuša ačhenas anglo tronos the anglo Bakroro, urde andro džinďarde parne gada a sas len andro vasta o palmi.

¹⁰ Vičinenas zorale hangoha a phenenas: „Amaro spaseňje hin le Devlestar, savo bešel pro tronos, the le Bakrorestar!“

¹¹ Savore aňjela ačhenas pašal o tronos the pašal o phureder the pašal o štar džide bitosťi. Pele pro muj anglo tronos a klaňinenas pes le Devleske

¹² a phenenas: „Amen! O lašariben, e slava, e goďaveripen, o paľikeriben, e pačiv, e moc the e zor amare Devleske pro furt! Amen!“

¹³ Jekh le phurederendar mandar phučľa: „Ko hine kala džene, save hine urde andro džinďarde parne gada? A khatar avle?“

¹⁴ Me leske odphenďom: „Rajeja, tu džanes.“ A phenďa mange: „Kala hine ola džene, save aven andral oda baro pharipen a rajbinde peskre gada a parňarde len andro rat le Bakroreskro.

¹⁵ Vašoda hine anglo tronos le Devleskro a služinen leske rat-džives andre leskro chramos. A Oda, ko bešel pro tronos, dživela maškar lende a chraňinela len.

¹⁶ Imar na ena buter bokhale aňi smedna; imar len na labarela aňi o kham aňi ňisavo aver tačipen.

¹⁷ Bo o Bakroro, savo hino maškar o tronos, ela lengro pasťjeris; ľidžala len paš o prameňis, khatar džal o džido paňi a o Del lenge khosela savore apsa pal o jakha.“