Žalmi 98 - Le Devleskero Lav Andre Romaňi Čhib Slovensko 2021

O Žalmos 98

1 Žalmos.

¹ Žalmos. Giľaven le RAJESKE nevi giľi, bo kerďa o zazraki. Leskro čačo vast the leskro sveto valos leske ande o viťazstvo.

² O RAJ diňa te džanel le narodenge peskro spaseňje a sikaďa lenge peskro spravodľišagos.

³ Leperďa peske pre peskro verno kamiben a pre peskri vernosť ko Izrael; savore agora la phuvakre dikhle o spaseňje amare Devleskro.

⁴ Giľaven radišagoha le RAJESKE, caľi phuv! Chuden te radisaľol a te giľavel!

⁵ Giľaven le RAJESKE la harfaha, mi šunďol o giľavipen la harfaha!

⁶ Phurden pro trubi the pro bakrane rohi! Vičinen radišagoha anglo RAJ, anglo Kraľis!

⁷ Mi hučinel o moros the savoro, so andre hin, o svetos a the ola, ko andre bešen!

⁸ O paňa mi tapčinen le vastenca; o verchi mi giľaven jekhetane radišagoha.

⁹ Mi giľaven anglo RAJ, bo avel te sudzinel e phuv. Ov sudzinela čačipnaha o svetos a le manušen spravodľišagoha.