Žalmi 95 - Le Devleskero Lav Andre Romaňi Čhib Slovensko 2021

O Žalmos 95

¹ Aven, giľavas radišagostar le RAJESKE, zorales bararas e Skala amara zachranakri!

² Aven, avas anglal leste le paľikeribnaha! Giľavas leske o radišagoskre chvali!

³ Bo o RAJ hino baro Del, baro Kraľis upral savore devla.

⁴ Andre leskre vasta hin o hlbini la phuvakre, o šťiti pro verchi hine leskre.

⁵ Leskro hin o moros, ov les kerďa a peskre vastenca forminďa e šuki phuv.

⁶ Aven, banďuvas angle leste andre chvala! Aven džas pro khoča anglo RAJ, amaro Stvoriťeľis!

⁷ Se ov hino amaro Del a amen sam o manuša pal leskri maľa, o bakrore, saven ľidžal leskro vast. Adadžives, te šunďanas leskro hangos:

⁸ „Ma phanden andre tumare jile sar andre Meriba, sar pre pušťa oda džives paš e Massa,

⁹ akor sar man tumare dada pokušinenas a skušinenas, kajte dikhle mire skutki.

¹⁰ Saranda berš man choľaravas kale manušenca a phenďom: ‚Furt hine le jileha avrether a mire droma na prindžaren.‘

¹¹ Vašoda andre choľi diňom lav: ‚Čačes na džana andre miro odpočinkos!‘ “