Žalmi 9 - Le Devleskero Lav Andre Romaňi Čhib Slovensko 2021

O Žalmos 9

¹ Oleske, ko ľidžal o bašaviben. Pal o Mut-labben. Le Davidoskro žalmos.

² Paľikerava tuke, RAJEJA, andral calo jilo; vakerava pal savore tire zazraki.

³ Radisaľuvava a bararava tut; giľavava o chvali tire naveske, ó Devla Nekbareder.

⁴ Mire ňeprijaťeľa visaľona palal; perena a merena anglal tu,

⁵ bo tu man diňal čačipen a zaačhiľal vaš ma, sar zabešľal pro tronos a sudzinehas čačipnaha.

⁶ Pokarhinďal le naroden a zňičinďal le nalačhen; tu khosľal avri lengro nav pro furt.

⁷ Amare ňeprijaťeľa hine zňičimen pro furt; lengre fori čhiďal tele; na ačhiľa pal lende aňi o leperiben.

⁸ Ale o RAJ kraľinel pro furt; ačhaďa peske o tronos, hoj te sudzinel.

⁹ Ov sudzinela o svetos čačipnaha; le naroden sudzinela pal o pravos.

¹⁰ Andro RAJ pes šaj garuven ola, ko cerpinen; ov hin o than pro garuďipen andro pharipen.

¹¹ Pre tu pes mukena ola, ko prindžaren tiro nav; se tu, RAJEJA, na omukes olen, ko tut roden.

¹² Giľaven o chvali le RAJESKE, savo troňinel pro Sion! Vakeren le narodenge pal leskre skutki!

¹³ Bo ov na bisterel te del pale olenge, ko murdaren; leperel peske pro roviben olengro, ko cerpinen.

¹⁴ Av ke mande jileskro, RAJEJA! Dikh, sar man trapinen ola, ko man našťi avri ačhen! Cirde man avri andral o brani le meribnaskre,

¹⁵ hoj te šaj vakerav pal savore veci, vaš save tut lašarav, andro brani le Sionoskra čhakre, a te šaj radisaľuvav, hoj man zachraňinďal.

¹⁶ O narodi pele andre chev, so kopaľinde avri; o pindro pes lenge zachudňa andre sita, so garude.

¹⁷ O RAJ pes diňa te prindžarel peskre čačipnaskre sudoha; o nalačhe manuša pes zachudle andre buči peskre vastengri.

¹⁸ O nalačhe džana pro than le mulengro, savore narodi, so bisteren pro Del.

¹⁹ Ale šoha pes na bisterela pro čore a šoha na našľola e naďej olengri, ko cerpinen.

²⁰ Ušťi, RAJEJA! Te na pes o manuš ľidžal upre! Mi en o narodi sudzimen anglal tute!

²¹ Muk pre lende e dar, RAJEJA; mi sprindžaren o narodi, hoj hine ča manuša.