Žalmi 88 - Le Devleskero Lav Andre Romaňi Čhib Slovensko 2021

O Žalmos 88

1 E giľi. Le Korachengro žalmos. Oleske, ko ľidžal o bašaviben pro giľavipen. Pal o machalat leannot . O maskil le Hemanoskro le Ezrachitaskro.

¹ E giľi. Le Korachengro žalmos. Oleske, ko ľidžal o bašaviben pro giľavipen. Pal o machalat leannot. O maskil le Hemanoskro le Ezrachitaskro.

² RAJA, Devla, Spasiťeľina miro, dživese ke tute vičinav, rači avav ke tute.

³ Mi džal miri modľitba dži paš tu; visar tiro kan pre miro roviben!

⁴ Miri duša hiňi pherdžarďi le trapišagoha, miro dživipen hin imar dži paš o Šeol.

⁵ Som rachimen maškar ola, ko džan tele andro hrobos; som sar murš bi e zor.

⁶ Som čhido maškar o mule, maškar o murdarde, save pašľon andro hrobos, pre save tuke imar na lepereha, save hine avricirdle andral tiro vast.

⁷ Čhiďal man tele andre nekbareder jama, andre nekkaleder chev.

⁸ Bešľa pre ma tiri choľi, začhiďal man tire vlnenca.

⁹ Iľal mange mire lačhe prijaťeľen; kerďal, hoj lenge te džungľuvav. Phandlo som andre a našťi man dochudav avri;

¹⁰ o jakha mange slabisaľon le pharipnastar. RAJEJA, sako džives ke tu vičinav, mire vasta ke tu nacirdav.

¹¹ Či kereha o zazraki prekal o mule? Či ušťena o mule, hoj tut te lašaren?

¹² Vakerel pes andro hrobos pal tiro verno kamiben a andro than le meribnaskro pal tiri vernosť?

¹³ Džanel pes andro kaľipen pal tire zazraki? Džanel pes pal tiro spravodľišagos andre phuv, kaj hine o manuša, pre save pes bisterďa?

¹⁴ Ale me vičinav ke tute, RAJEJA, hoj mange te pomožines; sig tosara miri modľitba džal ke tu.

¹⁵ Soske man odčhives, RAJEJA? Soske mange garuves tiro muj?

¹⁶ Terňipnastar cerpinav a som pašes paš o meriben; bo zľidžav tire phare tresti a imar na džanav aňi so te kerel.

¹⁷ Tiri bari choľi pregeľa prekal ma; tire strašna rani man zňičinde.

¹⁸ Začhiven man sako džives sar e potopa a rozthoven pes pašal ma pal dojekh sera.

¹⁹ Iľal mandar savore prijaťeľen the suseden; o kaľipen ačhiľa miro nekpašeder kamaratos.