Žalmi 83 - Le Devleskero Lav Andre Romaňi Čhib Slovensko 2021

O Žalmos 83

¹ E giľi. Le Asafoskro žalmos.

² Ó, Devla, ma av čhit; ma av kašuko a ma ačh cicho!

³ Se dikh, tire ňeprijaťeľa pes vzburinen; ola, ko tut našťi avri ačhen, hazden upre peskro šero.

⁴ Gondoľinen avri o nalačhe plani pre tire manuša, den pes radi pre ola, save hine tuke vzacna.

⁵ Phenen: „Aven, murdaras len avri, hoj te na ačhen narodoske, hoj pes imar šoha te na leperel pro nav le Izraeloskro!“

⁶ Jekhetane pes dovakerenas, a kerde maškar peste e zmluva pre tute –

⁷ o Edom the o Izmaeliti, o Moab the o Hagarijčana;

⁸ o manuša andral o Gebal, o Amnon the o Amalek, o Filišťinci the o manuša andral o Tir.

⁹ Pridine pes ke lende the o Asirčana, hoj te zoraľaren le Lotoskre čhaven.

¹⁰ Ker lenca avke sar le Midijanoha, avke sar le Siseraha the le Jabinoha paš o paňi Kišon,

¹¹ sar sas zňičimen paš o En-Dor a ačhile hnojoske pre phuv.

¹² Ker lengre rajenca avke, sar kerďal le Oreboha the le Zeeboha, ker savore lengre vodcenca sar le Zebachoha the le Calmunoha,

¹³ save peske phende: „Zalaha o maľi le Devleskre.“

¹⁴ Devla miro, ker lenca sar le prachoha, so hino rozphurdlo, sar le phuseha andre balvaj.

¹⁵ Sar e jag zlabarel o veš, sar o plameňis chal tele o verchi,

¹⁶ avke pal lende dža tira burkaha a darav len avri tira zoraľa balvajaha!

¹⁷ Učhar andre lengre muja ladžaha, RAJEJA, hoj te roden tiro nav.

¹⁸ Mi aven furt andre ladž the andre dar; mi ľoľon avri ladžatar a mi našľon!

¹⁹ Mi džanen, hoj tu, kaske hin o nav RAJ, sal nekbareder pre caľi phuv!