Žalmi 80 - Le Devleskero Lav Andre Romaňi Čhib Slovensko 2021

O Žalmos 80

¹ Oleske, ko ľidžal o bašaviben. Pro giľavipen: „O ľaľije la zmluvakre.“ Le Asafoskro žalmos.

² Šun amen, pasťjerina le Izraeloskro! Tu, so ľidžas le Jozef sar o stados a bešes upral o cherubi, sikav tut

³ anglo Efrajim, Benjamin the Menaše! Presikav tiri zor a av amen te zachraňinel!

⁴ Visar amen pale ke tu, Devla! Mi švicinel pre amende tiro muj, hoj te avas zachraňimen!

⁵ RAJEJA, Nekzoraleder Devla, dži kana aveha choľamen pro modľitbi tire manušengre?

⁶ Dehas len te chal o apsa avke sar o maro; diňal len te pijel o apsa andral e bari kuči.

⁷ Kerďal, hoj o narodi pašal amende pes te maren vaš amari phuv, a amare ňeprijaťeľa peske amendar te keren pheras.

⁸ Visar amen pale ke tu, Nekzoraleder Devla! Mi švicinel pre amende tiro muj, hoj te avas zachraňimen!

⁹ Iľal o viňičis avri andral o Egipt, tradňal het avre naroden a sadzinďal les.

¹⁰ Pripravinďal leske e phuv, mukľa o koreňa a pherdžarďa caľi phuv;

¹¹ peskre ciňoha učharďa andre o verchi, peskre konarenca o nekbareder cedri;

¹² leskre konara barile dži o Baro moros a o konarica dži o paňi Eufrat.

¹³ Soske phagerďal leskre muri, hoj sako, ko pašal predžala, peske te čhinel tele leskre hroznostar?

¹⁴ O dzivo balo andral o veš les obchal a o dziva džviri lestar čaľon.

¹⁵ Av pale ke amende, Nekzoraleder Devla! Dikh tele andral o ňebos pre amende! Starin tut pal kada viňičis,

¹⁶ pal kada kmeňos, savo sadzinďa tiro čačo vast, pal o čhavo, saves tuke bararďal avri.

¹⁷ O viňičis čhinde tele a labarde les avri: Dikh pre lende choľaha a zňičin len!

¹⁸ Ľiker tiro vast upral oda, kas tuke kidňal avri, upral o čhavo le manušeskro, saves tuke bararďal avri,

¹⁹ avke pes tutar na visaraha. Obdžiďar amen a lašaraha tiro nav!

²⁰ Visar amen pale ke tu, RAJEJA, Nekzoraleder Devla! Mi švicinel pre amende tiro muj, hoj te avas zachraňimen!