Žalmi 76 - Le Devleskero Lav Andre Romaňi Čhib Slovensko 2021

O Žalmos 76

¹ Oleske, ko ľidžal o bašaviben pro strunengro nastrojis. Le Asafoskro žalmos. E giľi.

² Le Devles prindžaren andre Judsko, baro hin leskro nav andro Izrael.

³ Andro Jeruzalem hin leskro Stanos, pro verchos Sion leskro kher.

⁴ Ode phagerďa o jagale šipi le lukenca, o šťitos the e šabľa, savore maribnaskre zbraňe.

⁵ Tu sal slavneder andre tiro švetlos a šukareder sar o čirlatune verchi.

⁶ O zorale slugaďa pašľon občorarde a soven le meribnaskre sovibnaha; imar ňiko lendar našťi hazdel peskre vasta pre amende.

⁷ Pre tiro dovakeriben, Devla le Jakoboskro, o graja the ola, ko upre bešenas, mule.

⁸ Tu sal oda, RAJEJA, kastar kampel te daral. Ko šaj paš tute obačhel, sar sal choľamen?

⁹ Andral o ňebos diňal te džanel tiro sudos, e phuv daranďiľa a ačhiľa čhit,

¹⁰ sar tu, Devla, ušťiľal upre, hoj te sudzines; te zachraňines savore strapimen manušen pre phuv.

¹¹ Sar mareha olen, pre kaste sal choľamen, o manuša tut lašarena; olen, ko ačhena te dživel pal tiri choľi, phandeha pašal tu sar koruna.

¹² Den le RAJESKE, tumare Devleske, oda, so phenďan! Oleske, kastar kampel te daral, mi anen o dari savore phuva, so hine pašal leste.

¹³ Ov pokorinel le vladaren a daravel avri le bare kraľen.