Žalmi 75 - Le Devleskero Lav Andre Romaňi Čhib Slovensko 2021

O Žalmos 75

¹ Oleske, ko ľidžal o bašaviben pro giľavipen: „Ma zňičin!“ Le Asafoskro žalmos.

² Lašaras tut, Devla, lašaras tut, bo tiro nav hino pašes; o manuša vakeren pal tire zazraki.

³ Tu phenes: „Andro časos, so diňom, sudzinava spravodľišagoha.

⁴ Sar e phuv le manušenca razisaľol, me som oda, ko ľikerel zorales lakre zakladi.“

⁵ Phenav le lašardenge: „Ma lašaren tumen!“ Le nalačhenge: „Ma hazden tumen upre!

⁶ Ma hazden tumen upre pro ňebos, ma vakeren avke barikanes!“

⁷ Aňi pal o vichodos, aňi pal o zapados, aňi pal e pušťa, ňiko pes našťi ľidžal upre,

⁸ bo ča o Del hino sudcas: Jekhes dikhel tele a avres hazdel upre.

⁹ Bo andre le RAJESKRO vast hin e kuči pherdžarďi la koreňimen moľaha, so peňinel; ov la čhivel avri a pijena latar savore nalačhe manuša pre phuv, pijena avri dži e posledno kapka.

¹⁰ Ale me furt vakerava pal tute, giľavava o chvali tuke, Devla le Jakoboskro.

¹¹ O Del phenel: „Odčhinava savori zor le nalačhe manušengri a hazdela pes upre e zor le spravodľive manušengri.“