Žalmi 74 - Le Devleskero Lav Andre Romaňi Čhib Slovensko 2021

O Žalmos 74

1 O maskil le Asafoskro.

¹ O maskil le Asafoskro. Devla, soske amen tutar odčhiďal? Odčhiďal amen pro furt? Soske labol tiri choľi pro bakrore pal tiri maľa?

² Leper tuke pre tire manuša, saven čirla dochudňal, pro manuša, saven cinďal avri sar tiro ďeďictvos, leper tuke the pro verchos Sion, kaj bešes.

³ Predža tut pal kala rozburimen muri, so hine čhide tele pro furt; dikh sar o ňeprijaťeľis zňičinďa savoro andro sveto Chramos!

⁴ Tire ňeprijaťeľa kerenas vika pre tiro sveto than a hazdle upre peskre maribnaskre zastavi.

⁵ Dičholas oda avke, sar te pes le tovereha čhingerďahas tele o stromi andro veš.

⁶ Savore kaštune ozdobi zňičinde le tovereha the le čokanoha.

⁷ Tiro sveto Chramos labarde avri dži e phuv a meľarde andre o kher tire naveskro.

⁸ Phende peske: „Calkom len zňičinaha!“ Andre phuv labarde avri savore thana, kaj pes lašarelas le Devles.

⁹ Imar na dikhas ňisave znameňja le Devlestar, nane imar ňisave proroka a ňiko amendar na džanel, dži kana oda ľikerela.

¹⁰ Devla, dži kana peske o ňeprijaťeľis kerela tutar pheras? Dophenela furt tire naveske?

¹¹ Soske amendar zľikeres tiro vast, tiro čačo vast? Hazde tiro vast a zňičin len!

¹² Ale o Del hino miro Kraľis čirlastar; ov anel o spaseňje pre phuv.

¹³ Tira zoraha rozďelinďal o moros, rozmarďal o šere le moroskre obludenge.

¹⁴ Phagerďal o šere le Levijatanoske, diňal, hoj les te chan o džviri pre pušťa.

¹⁵ Phundraďal o prameňis the o prudi le paňeskre; šučarďal avri o paňa, so furt čuľan.

¹⁶ Tiro hin o džives, tiri hiňi e rat; tu thoďal o čhon the o kham pre peskre thana.

¹⁷ Ačhaďal savore hraňici pre phuv, kerďal o ňilaj the o jevend.

¹⁸ Leper tuke, RAJEJA, sar tutar o ňeprijaťeľis asal, sar o diline dikhen tele tiro nav.

¹⁹ Ma de o dživipen tira holubicakro le dzive šelmenge! Šoha ma bister pro dživipen tire čore manušengro!

²⁰ Leper tuke pre tiri zmluva, bo pre phuv hin pherdo kale thana, kaj o maribnaskre murša vladňinen.

²¹ Ma domuk le strapimen manušes te džal het ladžaha! O čore the o slaba manuša mi lašaren tiro nav!

²² Ušťi upre, Devla, braňin tut! Leper tuke, sar tutar o dilino asal calo džives!

²³ Ma bister pro viskišagos olengro, ko pre tu džan, pre vika tire ňeprijaťeľengri, so na preačhel.