Žalmi 72 - Le Devleskero Lav Andre Romaňi Čhib Slovensko 2021

O Žalmos 72

1 Le Šalamunoske .

¹ Le Šalamunoske. Devla, de le kraľiske te sudzinel spravodľišagoha, le kraľiskre čhaske tire čačipnaha.

² Mi sudzinel čačipnaha tire manušen the le čore manušen spravodľišagoha.

³ O verchi mi anen le manušenge o požehnaňje a o brehi o spravodľišagos.

⁴ Mi zaačhel vaš ola, ko hine trapimen maškar o manuša, mi zachraňinel le čoren; mi zňičinel oles, ko len trapinel.

⁵ Mi lašaren tut dži akor, medik švicinel o kham the o čhonoro, pal jekh pokoleňje pre aver.

⁶ Avke sar del o brišind pre košimen maľa a sar e rosa cinďarel e phuv,

⁷ avke andre le kraľiskre dživesa mi kvitňisaľol o spravodľivo a mi el pherdo smirom dži akor, medik na našľola o čhonoro.

⁸ Mi kraľinel le morostar ko moros, le paňestar Eufrat dži pro agora la phuvake!

⁹ Banďona angle leste ola, ko dživen pre pušťa, a leskre ňeprijaťeľa ľizinena o prachos.

¹⁰ O kraľa andral o Taršiš the pal o ostrovi leske počinena o daňe, o kraľa andral e Šeba the andral e Saba anena o dari.

¹¹ Banďona anglal leste savore kraľa a služinena leske savore narodi.

¹² Ov zachraňinela le čores, sar vičinela, oles, kas nane ňič, kaske nane ko te pomožinel.

¹³ Hino jileskro ko slabo the ko čoro a zachraňinel o dživipen le čore manušengro.

¹⁴ Andral o trapišagos the mariben len zachraňinela, bo lengro dživipen hino vzacno andre leskre jakha.

¹⁵ Mi dživel but! Mi den leske o somnakaj andral e Šeba! Mi modľinen pes furt vaš leske a mi žehňinen leske sako džives!

¹⁶ Mi el pherdo zrnos andre odi phuv a mi en lenca o brehi le verchengre učharde. Mi barol ode but ovocje sar andro Libanon, mi kvitňisaľon o manuša andro fori sar e čar pre maľa.

¹⁷ Leskro nav ľikerela pro furt; medik o kham švicinela, leskro nav ačhela. Savore narodi ena požehňimen prekal leste a anena leske e chvala!

¹⁸ Barar le RAJES, le Devles, le Izraeloskre Devles! Ča ov kerel bare zazraki.

¹⁹ Mi el požehňimen leskro slavno nav pro furt a leskri slava mi pherdžarel caľi phuv! Amen, amen!

20 Dži kade hin o modľitbi le Davidoskre, le Izajoskre čhaskre.

²⁰ Dži kade hin o modľitbi le Davidoskre, le Izajoskre čhaskre.