Žalmi 7 - Le Devleskero Lav Andre Romaňi Čhib Slovensko 2021

O Žalmos 7

¹ Le Davidoskri žaľakri giľi, savi giľavelas le RAJESKE, anglo Benjaminovcos Kuš.

² RAJEJA, Devla miro, ke tute man denašav te garuvel. Zachraňin man savorendar, so pre mande džan, a le man avri,

³ hoj man te na čhingeren pro kotora sar o ľevos a ňiko mange našťi pomožinďahas.

⁴ RAJEJA, Devla miro, te ada kerďom, te hin o nalačhipen pre mire vasta:

⁵ Te kerďom o nalačho mire prijaťeľiske, abo te vaš ňisoske dukhaďom mire ňeprijaťeľis –

⁶ akor muk les, hoj pre ma te avel a te zalel man, te zamarel le pindrenca miro dživipen andre phuv, a te mukel man te pašľol bi e pačiv andro prachos.

⁷ Ušťi, RAJEJA, a choľisaľuv! Ačhav tut olenge, ko pre mande džan, lengra bara choľake! Ušťi upre a čačipnaha len odsudzin, Devla miro!

⁸ Skide pašal tute le manušen andral savore narodi a vladňin upral lende andral o ňebos!

⁹ O RAJ sudzinela savore manušen. RAJEJA, sikav, hoj som čačipnaskro, bo som ňevinno!

¹⁰ Mi preačhel o nalačhipen zaačh vaš o čačipnaskro manuš, čačipnaskro Devla, so dikhes dži andro jilo the andre goďi.

¹¹ O Del hino miro šťitos. Ov zachraňinel olen, ko hine čačejileskre.

¹² O Del hino čačipnaskro sudcas. O Del hino choľamen pro nalačhe manuša sako džives.

¹³ Te pes o manuš na visarel, o Del ostrarel peskri šabľa, nacirdel o lukos a džal te ľivinel;

¹⁴ pripravinel peske e meribnaskri zbraň, ľivinel o jagale šipi.

¹⁵ Dikh, o nalačho manuš ačhel khabno le nalačhipnastar, hordinel o pharipen a ločhol o klamišagos.

¹⁶ Kopaľinel e bari chev, ale ov korkoro andre perel;

¹⁷ o pharipen, so kamel te kerel avrenge, perela pre leskro šero, a o mariben, saveha kamel te dukhavel avren, visaľola pre leskri meň.

¹⁸ Paľikerava le Devleske, bo hino čačipnaskro; a giľavava o chvali le RAJESKE, le Nekbareder Devleske.