Žalmi 63 - Le Devleskero Lav Andre Romaňi Čhib Slovensko 2021

O Žalmos 63

¹ Le Davidoskro žalmos, so sas pisimen, sar sas pre judsko pušťa.

² Devla, tu sal miro Del! Rodav tut, soča avel avri o kham, miri duša hiňi smedno pal tute. Calo miro ťelos pes cirdel pal tute, sar e šuki phuv bi o paňi.

³ De tut mange te dikhel andro sveto Chramos, hoj te dikhav tiri zor the tiri slava.

⁴ Bo tiro verno kamiben hin feder sar o dživipen, mire vušta tut bararena.

⁵ Lašarava tut, medik ča dživava, andre tiro nav hazdava o vasta.

⁶ Miri duša čaľola avke, sar te chaľomas o nekfeder chaben, miro muj tuke giľavela, radišagoha tut le vuštenca lašarava.

⁷ Pro hadžos mange pre tu leperav, gondoľinav pre tu prekal e rat.

⁸ Tu sal miri pomoca, vašoda giľavava radišagoha andro ciňos tire kridlengro.

⁹ Miri duša pal tu igen džal, tiro čačo vast man podhazdel.

¹⁰ Ola, ko man kamen te murdarel, ena zňičimen a džana dži tele andre phuv.

¹¹ Ena dine andro vasta la šabľake, a lengre ťela chana o šakali.

¹² Ale o kraľis radisaľola andro Del; savore, ko pes pridžanen ke leskro nav, lašarena le Devles, no o vušta le klamarengre ena phandle andre.