Žalmi 58 - Le Devleskero Lav Andre Romaňi Čhib Slovensko 2021

O Žalmos 58

¹ Oleske, ko ľidžal o bašaviben pro giľavipen: „Ma zňičin!“ O michtam le Davidoskro.

² Vodcale, čačes vakeren o čačipen? Sudzinen le manušen jednakones?

³ Na! Bo tumare jilenca gondoľinen pro nalačhipen a tumare vastenca anen o maribena pre phuv!

⁴ Soča o nalačhe manuša avle pro svetos, odgele pre aver drom; bludzinen, kanastar uľile, a klaminen.

⁵ Hin andre lende jedos sar andro sapa; hine sar e kašuki kobra, savi peske phandel o kana,

⁶ hoj te na šunel o hangos le zaklinačiskro, le vražňikoskro, so džanel te čarinel.

⁷ Devla, mar lenge avri o danda andral o muj! Rozmar o piski ole ľevenge, RAJEJA!

⁸ Mi našľon sar o rozčhido paňi! Sar nacirdena o luki te ľivinel, mi peren lenge tele o šipi!

⁹ Mi en sar o šľimakos, so rozdžal, sar o čhavoro, so uľol mulo a šoha na dikhel o kham!

¹⁰ E zoraľi balvaj mi lel het o koľaka telal o pira sigeder, sar roztačona, či ena zelena abo šuke.

¹¹ O spravodľivo radisaľola, sar dikhela e pomsta, sar peske močinela o pindre andro rat le nalačhe manušeskro.

¹² Akor o manuša phenena: „Hin čačo, hoj o spravodľivo chudela e odmena. Čačes hin Del, so sudzinel pre phuv.“