Žalmi 50 - Le Devleskero Lav Andre Romaňi Čhib Slovensko 2021

O Žalmos 50

1 Le Asafoskro žalmos.

¹ Le Asafoskro žalmos. O Del, o Del o RAJ, vakerel a vičinel caľi phuv le vichodostar dži o zapados.

² Pal o Sion, pal o nekšukareder than, o Del švicinel.

³ Amaro Del avel a nane čhit; anglal leste e bari jag zlabarel savoro a pašal leste phurdel igen zoraľi balvaj.

⁴ Vičinel pro ňebos upre the pre phuv, hoj te sudzinel peskre manušen.

⁵ „Skiden mange mire pačivale manušen, save manca phandle e zmluva paš e obeta.“

⁶ O ňebos vakerel pal leskro spravodľišagos, bo o Del korkoro hino sudcas.

⁷ „Šunen, mire manušale, a me vakerava! Svedčinava pre tute, Izrael: Me som o Del, tiro Del.

⁸ Na karhinav tut vaš tire obeti abo vaš tire labarde obeti, so hine furt anglal mande.

⁹ Na kampel mange te lel andral tiro kher le bikos, aňi o kozi tire stadendar,

¹⁰ bo mire hine savore džviri andro veša the o dobitkos pro ezera verchi.

¹¹ Prindžarav savore čiriklen andro verchi, miro hin savoro, so pes čhalavel pro maľi.

¹² Te uľomas bokhalo, phenďomas oda tuke? Se miro hin o svetos savoreha, so andre hin.

¹³ Či chav o mas le bikengro? Či pijav o rat le capengro?“

¹⁴ „Obetin le Devleske e paľikeribnaskri chvala a doľiker le Nekbaredereske o lava!

¹⁵ Vičin pre ma oda džives, sar tuke ela phares, me tut zachraňinava a tu man lašareha.“

¹⁶ Ale le nalačhe manušeske o Del phenel: „Sar šaj les mire prikazaňja andre tiro muj a miri zmluva pre tire vušta,

¹⁷ te tuke na des mandar ňič te phenel a mire lava tutar odčhives?

¹⁸ Te dikhes le zbujňikos, sthoves tut leha a ľikeres tut olenca, ko nane pačivale peskre romňijenge.

¹⁹ Domukes tire mujeske te vakerel o nalačhipen a la čhibaha furt klamines.

²⁰ Bešes a vakeres o pľetki pre tiro phral, džungľares tira dakre čhas.

²¹ Kada kerehas a me somas čhit, vašoda tuke gondoľinehas, hoj som ajso sar tu. Akana tut obviňinav a čhivav tuke oda pro jakha.“

²² „Tumen, so bisteren pro Del, achaľon kaleske, hoj tumen te na čhingerav pro kotora a na pomožinela tumenge ňiko.

²³ Oda, ko mange obetinel e paľikeribnaskri chvala, oda man del pačiv a me, o Del, sikavava miro spaseňje oleske, ko pes ľikerel pro lačho drom.“