Žalmi 49 - Le Devleskero Lav Andre Romaňi Čhib Slovensko 2021

O Žalmos 49

¹ Oleske, ko ľidžal o bašaviben. Le Korachengro žalmos.

² Šunen oda, savore narodale! Šunen mištes, savore, so dživen pro svetos,

³ savore manušale, tumen o barvale the o čore.

⁴ Miro muj vakerela o goďaver lava a o gondoľišagi mire jileskre tumen dena goďi.

⁵ Visarava miro kan ko prislovje, paš o hangos la harfakro phenava avri miro garuďipen.

⁶ Soske man te darav andro nalačhe dživesa, akor sar pes pre ma rozthoven o ňeprijaťeľa?

⁷ On pes muken pre peskro majetkos a presikaven pes but barvaľipnaha.

⁸ Ňiko našťi cinel avri o dživipen avreske, aňi vaš peskri duša našťi počinel le Devleske.

⁹ Bo e cena vaš o dživipen hiňi igen bari, o manuš šoha našťi počinel dos,

¹⁰ hoj te dživel furt a hoj šoha te na merel.

¹¹ Se sako dikhel, hoj the o goďaver meren; o diline the o nagoďaver tiš meren a peskro barvaľipen muken avrenge.

¹² O hrobi hin lengre khera pro furt, bešen ode pokoleňje pro pokoleňje, kajte pes o phuva vičinenas pal lengre nava.

¹³ Ňisave manušes našťi zachraňinel o barvaľipen le meribnastar, merela avke sar the o džviri.

¹⁴ Kavke doperena ola, ko pes muken korkore pre peste, the ola, ko pal lende džan a prilen lengro vakeriben.

¹⁵ Hine sar o bakre, so hine avrikidle pre oda, hoj te džan pro than le mulengro; o meriben ela lengro pasťjeris. Tosara o čače manuša vladňinena upral lende a lengro ťelos kirňola andro than le mulengro dur lengre barikane kherendar.

¹⁶ Ale miri duša o Del cinela avri andral e zor le meribnaskri a lela man paš peste.

¹⁷ Ma dara tut, sar vareko barvaľol, sar leske barol o šukariben andro kher,

¹⁸ bo sar merela, ňič peha na lela; leskro barvaľipen leha na džala tele andro hrobos.

¹⁹ Kajte pre peste phenel, medik dživel, hoj hino požehňimen – a o manuša les lašaren, hoj leske savoro avel avri –

²⁰ the avke leskri duša džala ode, kaj hine leskre papi, a šoha na dikhena o švetlos le dživipnaskro.

²¹ O barvalo manuš, saves nane goďi, merela avke sar the o džviri.