Žalmi 46 - Le Devleskero Lav Andre Romaňi Čhib Slovensko 2021

O Žalmos 46

¹ Oleske, ko ľidžal o bašaviben. E giľi prekal o učo hangos.

² O Del hin amari ochrana the zor; e pomoca, pre savi pes šaj mukas andro pharipen.

³ Vašoda pes na daraha, kajte pes e phuv čhalavela; kajte o verchi perena maškar o moros;

⁴ kajte leskre paňa hučinena a peňinena a kajte o brehi razisaľona le bare vlnendar.

⁵ O paňi anel peskre jarkenca o radišagos le Devleskre foroske, le svete thaneske, kaj bešel o Nekbareder.

⁶ O Del hin maškar oda foros, na čhalavela pes; o Del leske pomožinela, sar vidňisaľola.

⁷ O narodi pes daran, o kraľišagi izdran; ov del te šunel peskro hangos a e phuv rozdžal.

⁸ O Nekzoraleder Del hin amenca. O Del le Jakoboskro hin amaro hrados.

⁹ Aven a dikhen pro skutki le RAJESKRE, savo kerel strašna pohromi pre phuv;

¹⁰ zaačhavel o maribena pal caľi phuv; phagel o lukos, phagerel e kopija; labarel o šťiti andre jag.

¹¹ O Del phenel: „Aven čhit a achaľon, hoj me som o Del! Me som barardo maškar o narodi, me som barardo pre phuv.“

¹² O Nekzoraleder RAJ hin amenca; o Del le Jakoboskro hin amaro hrados.