Žalmi 45 - Le Devleskero Lav Andre Romaňi Čhib Slovensko 2021

O Žalmos 45

¹ Oleske, ko ľidžal o bašaviben. Pro giľavipen: „O ľaľije“. O maskil le Korachengro. E kamibnaskri giľi.

² Miro jilo hino pherdo le šukar lavenca, vašoda sthovav giľi mire kraľiske; miri čhib hiňi sar o pirkos le lačhe pisariskro.

³ Tu sal nekšukareder le muršendar, tire vušta hine pomazimen la milosťaha, vašoda tut o Del požehňinďa pro furt.

⁴ Phand tiri šabľa pašal tute, tu, zoralo muršeja! Uri tut andre slava the andro šukariben!

⁵ Andre tiri slava dža tire verdaneha andro mariben; mar tut vaš o čačipen, vaš e pokora the vaš o spravodľišagos. Mi sikaven pes prekal tiro čačo vast o bare skutki!

⁶ Tire ostra šipi predemena o jile olengre, ko džan pro kraľis; o narodi tuke perena tel o pindre.

⁷ Tiro tronos, ó, Devla, hino na veki vekov a kraľineha le spravodľive žezloha!

⁸ Zakamľal tut andro spravodľišagos a našťi avri ačhes o nalačhipen, vašoda tut o Del, tiro Del, pomazinďa le olejoha pro radišagos buter sar olen, ko hine tuha.

⁹ Savore tire gada voňinen pal e mirha, pal o aloe the pal e kasija; andral o palacis obthodo la slonovinatar tuke o lavutara bašaven.

¹⁰ O čhaja le kraľengre hine maškar o džuvľa andre tiro palacis. Pre tiri čači sera ačhel e terňi le kraľiskri a pre late hin o somnakaj andral o Ofir.

¹¹ Prithov tiro kan, terňije, šun mištes a gondoľin pal oda: Bister pre tire manuša the pre tire dadeskro kher;

¹² o kraľis džal pal tiro šukariben; banďuv anglal leste, bo ov hino tiro raj.

¹³ O čhaja andral o foros Tir tuke anena dari, o barvale manuša tuke kamena te el pre dzeka.

¹⁴ E terňi le kraľiskri avel andro palacis bare šukaribnaha; o gada la hin obside le somnakaha;

¹⁵ andro šukar avriside gada la ľidžan ko kraľis; pal late avena lakre družički, o pačivale čhaja.

¹⁶ Anena len bare radišagoha; kavke avena andro palacis le kraľiskro.

¹⁷ Tire čhave zalena o than tumare dadenge, ačhaveha len rajenge upral caľi phuv.

¹⁸ Leperava tiro nav savore pokoleňjenge. Vašoda tut o narodi lašarena na veki vekov.