Žalmi 44 - Le Devleskero Lav Andre Romaňi Čhib Slovensko 2021

O Žalmos 44

¹ Oleske, ko ľidžal o bašaviben. O maskil le Korachengro.

² Devla, šunďam amare kanenca, sar amenge amare dada vakerenas pal o bare skutki, save kerďal andre lengre dživesa, andre čirlatune časi.

³ Tire vasteha cirdňal avri le naroden a amare daden sadzinďal andre lengri phuv. Avre naroden dukhavehas, ale lenge diňal te barol a te zoraľol.

⁴ Bo na peskra šabľaha zaile e phuv, na lengro vast lenge pomožinďa te zviťazinel, ale tiro čačo vast, tiri zor the o švetlos tire mujeskro, bo tu len kamehas.

⁵ Devla, tu sal miro Kraľis! Tu prikazinďal, hoj o Jakob te el zachraňimen.

⁶ Tuha rozdemaha olen, ko pre amende džan, andre tiro nav ušťaraha pre ola, ko pes amenge ačhaven.

⁷ Na mukav man pre miro lukos a miri šabľa man na zachraňinela,

⁸ bo tu amen zachraňinďal le ňeprijaťeľendar a kerďal ladž olenge, ko amen našťi avri ačhen.

⁹ Le Devleha pes lašaraha sako džives a tiro nav bararaha pro furt!

¹⁰ Ale tu amen akana odčhiďal a kerďal amenge ladž! Tu imar na džas amare armadenca.

¹¹ Kerďal, hoj te denašas het andral o mariben, a ola, ko amen našťi avri ačhen, amen občorarde.

¹² Diňal amen te murdarel avri sar le bakren a roztradňal amen maškar o narodi.

¹³ Bikenďal tire manušen tuňones a na mangľal vaš lenge but.

¹⁴ Kerďal amenge ladž angle amare susedi; anďal amen avri pro asaben the pro pheras anglal lende.

¹⁵ Kerďal, hoj maškar o narodi peske te keren pheras amare navestar; o nipi pre amende kivinen le šerenca.

¹⁶ Miri ladž hiňi calo džives angle mande; miro muj hino ladžaha učhardo andre

¹⁷ anglo asaben the dopheňiben; anglo ňeprijaťeľis, savo mange kamel te visarel pale e dukh.

¹⁸ Kada savoro avľa pre amende, kajte amen pre tu na bisterďam a na prephagľam tiri zmluva.

¹⁹ Amaro jilo pes tutar na visarďa; amare pindre na odgele tire dromestar.

²⁰ Ale tu amen omukľal domarden andre phuv le šakalengri a učharďal amen andro kaľipen.

²¹ Te bisterďamas pro nav amare Devleskro a nacirdňamas o vasta ko cudzo del,

²² či tu, Devla, na avľalas pre oda? Se tu džanes, so hin garudo andro jilo!

²³ Vaš tuke amen murdaren calo džives; keren amenca sar le bakrorenca, saven ľidžan te murdarel.

²⁴ Ušťi upre, Rajeja! Soske soves? Preker tut! Ma odčhiv amen pro furt!

²⁵ Soske garuves o muj? Soske bisteres pre amaro čoripen the trapišagos?

²⁶ Se amen našľiľam andro prachos; pašľuvas le mujeha pre phuv.

²⁷ Av a pomožin amenge! Zachraňin amen, bo tiro kamiben hino pačivalo!