Žalmi 43 - Le Devleskero Lav Andre Romaňi Čhib Slovensko 2021

O Žalmos 43

¹ Devla, sikav, hoj som čačipnaskro, a zaačh vaš ma anglo bijedevleskro narodos! Zachraňin man olendar, ko hine falošna the nalačhe!

² Tu sal, Devla, miro than, kaj man garuvav. Soske man odčhiďal? Soske mušinav te phirel smutno vaš o ňeprijaťeľis, so man trapinel?

³ Bičhav tiro švetlos the tiro čačipen, hoj man te ľidžan! Mi anen man pre tiro sveto verchos, pre oda than, kaj tu bešes.

⁴ Avke avava paš o oltaris le Devleskro, ko Del, savo mange del te radisaľol. Radisaľuvava a pre harfa tut lašarava, Devla, miro Devla.

⁵ Soske sal smutno, dušo miri? Soske tut trapines? Užar pro Del, bo mek les lašarava, mire Spasiťeľis, mire Devles.