Žalmi 36 - Le Devleskero Lav Andre Romaňi Čhib Slovensko 2021

O Žalmos 36

¹ Oleske, ko ľidžal o bašaviben. Le RAJESKRE služobňikostar le Davidostar.

² O nalačho manuš šunel, so leske phenel o binos andro jilo, a nane andre leste ňisavi dar le Devlestar.

³ Igen but peske pal peste gondoľinel, vašoda na udžanel peskro binos a na odsudzinel les.

⁴ O lava andral leskro muj hin ča o nalačhipen the o klamišagos; preačhiľa te kerel goďaha the mištes.

⁵ Pre peskro hadžos gondoľinel avri o nalačhipen, mukľa pes pro nalačhe droma a na odphenel le nalačhipnaske.

⁶ RAJEJA, tiro verno kamiben dodžal dži o ňebos a tiri vernosť dži o chmari.

⁷ Tiro spravodľišagos hin sar o nekučeder verchi, tire sudi sar le moroskre hlbini. RAJEJA, starines tut pal o manuša the pal o džviri.

⁸ Savo vzacno hin tiro verno kamiben, Devla! Savore manuša pes garuven andro ciňos tire kridlengro.

⁹ Čaľaren pes le pherdo chabenenca andral tiro kher, des lenge te pijel andral o paňi tire lačhipnastar.

¹⁰ Tu sal o prameňis le dživipnaskro; andre tiro švetlos dikhas o švetlos.

¹¹ Ma preačh te del tiro verno kamiben olen, ko tut džanen, the tiro spravodľišagos olen, ko hine čače andro jile.

¹² Te na uštarel pre ma o pindro le barikaneskro a te na man tradel het o vast le nalačhe manušeskro.

¹³ Dikh, sar pele ola, ko keren o nalačhipen; sas čhide tele a našťi ušťen upre!