Žalmi 3 - Le Devleskero Lav Andre Romaňi Čhib Slovensko 2021

O Žalmos 3

¹ Le Davidoskro žalmos. Sar denašelas peskre čhastar le Absolonostar.

² RAJEJA, keci but džene pre mande džan! Keci but pre mande aven!

³ But džene pal ma phenen: „O Del leske na pomožinela!“

⁴ Ale tu, RAJEJA, sal pašal ma sar o šťitos. Sal miri slava; hazdes upre miro šero.

⁵ Zorales vičinav pro RAJ a ov mange odphenela pal peskro sveto verchos.

⁶ Pašľiľom mange, zasučom a ušťiľom, bo o RAJ man ľikerel.

⁷ Na darav man le but ezera manušendar, so pes rozthode pašal ma.

⁸ Ušťi upre, RAJEJA, zachraňin man, Devla miro! Tu rozmares o muja savorenge, ko pre ma džan, a mares avri o danda le nalačhenge.

⁹ Le RAJESTAR avel o spaseňje. Tiro požehnaňje mi avel pre tire manuša!