Žalmi 28 - Le Devleskero Lav Andre Romaňi Čhib Slovensko 2021

O Žalmos 28

1 Le Davidoskro žalmos.

¹ Le Davidoskro žalmos. RAJEJA, vičinav ke tute! Skalo miri, prithov tiro kan ke ma! Te aveha čhit, avava ajso sar ola, ko džan tele andro hrobos.

² Šun miro pokorno mangipen, sar ke tu vičinav, hoj mange te pomožines, a hazdav mire vasta ke tiro Neksveteder than.

³ Ma odčhiv man het jekhetane le binošne manušenca abo olenca, ko keren o nalačhipen, ko vakeren avrenca šukares, ale andro jile hine choľamen.

⁴ Mar len vaš lengre skutki, vaš lengro nalačhipen. Mar len vaš oda, so kerde; visar lenge pale oda, so peske zaslužinen.

⁵ Se on na achaľon o skutki le RAJESKRE aňi oda, so kerďa peskre vastenca. Ov len čhivela tele a šoha len na ačhavela pale upre.

⁶ Bararav tut, RAJEJA, bo šunďal miro pokorno mangipen.

⁷ O RAJ hino miri zor the miro šťitos; miro jilo leske pačal. Ov mange pomožinďa, vašoda miro jilo igen radisaľol a mira giľaha leske paľikerava.

⁸ O RAJ hin e zor peskre manušengri; o than pre ochrana peskre pomazimen kraľiske.

⁹ Zachraňin tire manušen, RAJEJA! Požehňin tiro ďeďictvos! Av lengro pasťjeris pro furt!