Žalmi 24 - Le Devleskero Lav Andre Romaňi Čhib Slovensko 2021

O Žalmos 24

1 Le Davidoskro žalmos.

¹ Le Davidoskro žalmos. Le RAJESKRI hiňi e phuv the savoro, so andre hin, o svetos the ola, ko andre dživen;

² se ov les zathoďa pro mori a ačhaďa pro paňa.

³ Ko šaj džal upre pro verchos le RAJESKRO? Ko šaj ačhel pre leskro sveto than?

⁴ Oda, kaste hin o vasta ňevinna a o jilo žužo; oda, ko na lašarel o modli a ko na lel vera falošňe.

⁵ Oda chudela o požehnaňje le RAJESTAR the o spravodľišagos le Devlestar, leskre Spasiťeľistar.

⁶ Kajse hine o manuša, save les roden, save roden tiro muj, Devla le Jakoboskro.

⁷ Branale, phundraven tumen! Phurikane vudarale, otkeren tumen, te šaj avel andre o Kraľis la slavakro!

⁸ Ko hin oda Kraľis la slavakro? O RAJ, o zoralo a mocno; o RAJ, o zoralo andro mariben.

⁹ Branale, phundraven tumen! Phurikane vudarale, otkeren tumen, te šaj avel andre o Kraľis la slavakro!

¹⁰ Ko hin oda Kraľis la slavakro? O RAJ o Nekzoraleder. Ov hin oda Kraľis la slavakro!