Žalmi 21 - Le Devleskero Lav Andre Romaňi Čhib Slovensko 2021

O Žalmos 21

¹ Oleske, ko ľidžal o bašaviben. Le Davidoskro žalmos.

² RAJEJA, o kraľis radisaľol andre tiri zor. Savo baripen thovel andre tiri zachrana!

³ Diňal les oda, so kamelas andro jilo, a na odphenďal leske oda, so mangelas le vuštenca.

⁴ Anďal leske o barvale požehnaňja, thoďal leske pro šero e koruna le žuže somnakastar.

⁵ Mangelas tutar o dživipen, diňal les but dživesa, večňe a pro furt.

⁶ Kerďal lestar slavno prekal tiri zachrana, urďal les andro šukariben the andre bari pačiv.

⁷ Požehňinďal les pro furt a diňal les baro radišagos olestar, hoj sal leha.

⁸ O kraľis pačal le RAJESKE; vaš o verno kamiben le Nekbareder Devleskro na čhalavela pes.

⁹ Tiro vast arakhela savore tire ňeprijaťeľen; tiro čačo vast arakhela savoren, ko tut našťi avri ačhen.

¹⁰ Soča tut sikaveha, RAJEJA, zlabareha len sar o jagalo bov. Andre tiri choľi len rozžuvineha, e jag len chala.

¹¹ Lengre čhaven khoseha avri pal kadi phuv the lengro potomstvos le manušendar.

¹² Kamenas tuke te kerel o nalačhipen a gondoľinenas avri o pasci, ale na avle lenge avri,

¹³ bo mušinena te denašel het, sar pre lende mukeha tire šipi.

¹⁴ RAJEJA, ušťi upre andre tiri zor! Amen giľavaha a lašaraha tut, bo sal igen zoralo!