Žalmi 2 - Le Devleskero Lav Andre Romaňi Čhib Slovensko 2021

O Žalmos 2

¹ Soske o narodi gondoľinen pro vzburi a o manuša pes dovakeren pro zbitočna veci?

² O kraľa pre phuv pes zdžan a o vodci pes dovakeren maškar peste, sar te džal pro RAJ the pre leskro pomazimen kraľis.

³ Phenen: „Rozčhingeras o puta! Las pes avri andral lengre lanci!“

⁴ Oda, ko bešel pro tronos andro ňebos, asal peske; o RAJ peske lendar asal.

⁵ Akor andre choľi prevakerela a peskra choľaha len daravela avri:

⁶ „Me thoďom mire kraľis pro Sion, pre miro sveto verchos.“

⁷ A o kraľis phenďa: „Vakerava oda, so diňa avri o RAJ. Ov mange phenďa: ‚Tu sal miro čhavo, adadžives ačhiľom tiro Dad.

⁸ Mang mandar a me tuke dava le naroden sar ďeďictvos, caľi phuv ela tiri.

⁹ Phagereha len la trastuňa pacaha; rozmareha len sar o čikakre pira.‘ “

¹⁰ Kraľale, aven goďaver! Sudcale la phuvakre, prilen o dovakeriben!

¹¹ Služinen le RAJESKE la daraha! Radisaľon, ale the izdran lestar!

¹² Čumiden le čhas, hoj te na choľisaľol a te na meren le dromeha, bo leskri choľi šaj avel jekhvareste. Bachtale hine savore, ko pes garuven andre leste.