Žalmi 19 - Le Devleskero Lav Andre Romaňi Čhib Slovensko 2021

O Žalmos 19

¹ Oleske, ko ľidžal o bašaviben. Le Davidoskro žalmos.

² O ňebos vakerel pal le Devleskri slava, e obloha sikavel pre buči leskre vastengri.

³ O džives le dživeseske pal oda vakerel a e rat la račake oda del te džanel

⁴ bi o vakeriben, bi o lava, aňi na šunďol lengro hangos.

⁵ Ale lengro hangos pes rozľigenďa pal caľi phuv a lengre lava dži pro agor le svetoske. O Del andro ňebos kerďa than le khameske.

⁶ Sako tosara avel avri sar o terno andral peskro kher, radisaľol sar o hrďinas, so denašel peskro drom.

⁷ Pre jekh agor le ňeboskro avel avri, pre dujto zadžal andre; ňič pes našťi garuvel leskre tačipnaske.

⁸ Le RAJESKRO zakonos hino dokonalo, del amen nevi zor. Pre le RAJESKRE lava pes šaj te mukel; olestar, ko na achaľol, keren goďaver.

⁹ Le RAJESKRE prikazi hine čače, pherdžaren o jilo radišagoha. Le RAJESKRO prikazaňje hino žužo, le jakhenge del o švetlos.

¹⁰ E sveto dar anglo RAJ hiňi lačhi, ľikerel pro furt; Le RAJESKRE sudi hine čače, savore hine čačipnaskre.

¹¹ Mon buter sar o somnakaj, sar pherdo žužo somnakaj; guleder hine sar o medos, sar o nekfeder medos.

¹² Den goďi tire služobňikos; oles, ko len doľikerel, užarel baro počiňiben.

¹³ Ale ko dikhel peskre chibi? Odmuk mange the o bini, savendar na džanav.

¹⁴ Ma domuk man te kerel oda, so džanav, hoj nane lačho, hoj man oda nalačhipen te na zachudel. Akor avava bi e chiba, žužo le bare binostar.

¹⁵ Mi aven tuke pre dzeka o lava andral miro muj, the oda, so gondoľinel miro jilo anglal tu, RAJEJA, Skalo miri, Vikupiťeľina miro!