Žalmi 16 - Le Devleskero Lav Andre Romaňi Čhib Slovensko 2021

O Žalmos 16

1 O michtam le Davidoskro.

¹ O michtam le Davidoskro. Ochraňin man, Devla, bo ke tute man denašav te garuvel!

² Phenav le RAJESKE: „Tu sal miro RAJ! Bijal tu man nane ňič lačho.“

³ Le Devleskre avrikidle nipi, so hine pre kadi phuv, hine slavna manuša, andre save man hin o radišagos.

⁴ Ola, ko denašen pal aver devla, cerpinena furt buter. Me ole devlenge na anava le rateskri obeta a na lava lengre nava pro vušta.

⁵ Tu, RAJEJA, sal miro ďeďictvos, tu mange keres miro drom, miro dživipen hin andre tire vasta.

⁶ Miro pľacos chudňom pro šukar thana, igen mange hin pre dzeka miro ďeďictvos.

⁷ Lašarava le RAJES, savo man ľidžal, mek the rači mange oda o jilo leperel.

⁸ Me džanav, hoj o RAJ hino furt paš mande. Ov hino paš miro čačo vast, ňič manca na čhalavela.

⁹ Vašoda miro jilo radisaľol, hin man radišagos a miro ťelos ela chraňimen,

¹⁰ bo na mukeha miri duša pre oda than, kaj hine o mule, aňi na deha tire pačivaloneske, hoj leskro ťelos te kirňol.

¹¹ Des mange te prindžarel o drom le dživipnaskro, paš tute hin pherdo radišagos, pal tiri čači sera hin o lačhipen pro furt.