Žalmi 150 - Le Devleskero Lav Andre Romaňi Čhib Slovensko 2021O Žalmos 150 1 Haleluja! Lašaren le Devles andre leskro Chramos! Lašaren leskri zor andro ňebos! 2 Lašaren les vaš o zorale veci, so kerďa! Lašaren les, bo hino nekbareder! 3 Lašaren les pre bakraňi truba! Lašaren les pre harfa the pre citara! 4 Lašaren les pre bubnica le kheľibnaha! Lašaren les pre lavuta the pre flauta! 5 Lašaren les pre cimbalma! Lašaren les pre zoraľi cimbalma! 6 Savoro džido, so dichinel, mi lašarel le RAJES! Haleluja! |
©The Word for the World International and ©The Word for the World Slovakia, 2023.