Žalmi 149 - Le Devleskero Lav Andre Romaňi Čhib Slovensko 2021

O Žalmos 149

¹ Haleluja! Giľaven le RAJESKE nevi giľi, lašaren les maškar leskre verna manuša, sar hine zgele.

² Mi radisaľol o Izrael peskre Stvoriťeľistar, o čhave le Sionoskre mi thoven baripen andre peskro kraľis.

³ Le kheľibnaha mi lašaren leskro nav, mi giľaven leske paš e bubna the citara.

⁴ Le RAJES hin radišagos peskre manušendar a le pokornen koruňinela la zachranaha.

⁵ O pačivale manuša mi khelen, bo zviťazinde, a mi giľaven radišagostar pre peskre hadži.

⁶ Mi el e chvala le Devleskri andre lengro muj a e šabľa, so čhinel pal soduj seri, andro vasta,

⁷ hoj te domaren le naroden a hoj te potrestinen avre manušen,

⁸ hoj lengre kraľen te phanden le lancenca a lengre rajen le trastune kľiginenca,

⁹ hoj len te sudzinen, avke sar hin pisimen. Oda ela pre slava savore leskre pačivale manušenge. Haleluja!