Žalmi 148 - Le Devleskero Lav Andre Romaňi Čhib Slovensko 2021

O Žalmos 148

¹ Haleluja! Lašaren le RAJES andral o ňebos, lašaren les upre andro chmari!

² Lašaren les, savore leskre aňjelale, lašaren les, savore leskre ňeboskre armadale!

³ Lašar les, khameja the čhonoreja! Lašaren les, savore jasna čercheňale!

⁴ Lašaren les, tumen o nekučeder ňebi the o paňa, so hine upre andro luftos!

⁵ Mi lašaren o nav le RAJESKRO, bo ov prikazinďa a sas stvorimen;

⁶ ačhaďa len pro furt, diňa avri prikazis, so šoha na preačhela.

⁷ Lašaren le RAJES savore, so san pre phuv, o moroskre obludi the savore oceani,

⁸ o bleski, o ľegi, o jiv the o chmari, e zoraľi balvaj, so kerel oda, so phenel.

⁹ Lašaren les, o verchi the savore brehi, o ovocna stromi the savore cedri,

¹⁰ o dziva džviri the savoro dobitkos, ola, so pes cirden pal e phuv, the o čirikle.

¹¹ Lašaren les, savore narodi the o kraľa pre phuv, savore vladara the o raja pre phuv,

¹² o terne čhave the o terne čhaja, o phure the o čhavore!

¹³ Lašaren le RAJESKRO nav, bo leskro nav hin upral dojekh nav; leskri slava hin upral o ňebos the upral e phuv.

¹⁴ Ov diňa zor peskre narodos, hoj les te lašaren savore leskre pačivale – o Izraeliti, o manuša, save leske hine pašes paš o jilo. Haleluja!