Žalmi 146 - Le Devleskero Lav Andre Romaňi Čhib Slovensko 2021

O Žalmos 146

¹ Haleluja! Lašar le RAJES, dušo miri!

² Lašarava le RAJES, medik ča dživav, giľavava o chvali mire Devleske calo miro dživipen.

³ Ma muken pes pro vodci, ma muken pes pro manuša, bo on našťi zachraňinen.

⁴ Sar lendar džala avri o duchos, džana pale andre phuv a oda džives našľola savoro, so kamenas te kerel.

⁵ Bachtalo oda, kaske pomožinel o Del le Jakoboskro; ko pes mukel pro RAJ, pre peskro Del,

⁶ savo stvorinďa o ňebos the e phuv, o moros the savoro, so andre hin, a savo ačhel verno pro furt.

⁷ Ov zaačhel vaš o strapimen a le bokhalen del te chal. O RAJ lel avri le zaphandlen andral e bertena.

⁸ O RAJ del, hoj o kore te dikhen. O RAJ hazdel upre olen, ko hine strapimen, o RAJ kamel olen, ko hine čačipnaskre.

⁹ O RAJ chraňinel le cudzincen a pomožinel le vdovenge the le širotenge, ale musarel o plani le nalačhenge.

¹⁰ O RAJ kraľinela pro furt. Ó, Sionona, tiro Del vladňinela andral jekh pokoleňje pre aver. Haleluja!