Žalmi 142 - Le Devleskero Lav Andre Romaňi Čhib Slovensko 2021

O Žalmos 142

1 Le Davidoskro maskil . E modľitba, sar sas andre jaskiňa.

¹ Le Davidoskro maskil. E modľitba, sar sas andre jaskiňa.

² Zorales vičinav ko RAJ, vičinav ko RAJ, hoj ke ma te avel jileskro.

³ Leske phenav avri miri žaľa a vakerav pal miro pharipen.

⁴ Sar miro duchos andre ma slabisaľol, akor tu des pozoris pre miro chodňikos. Pre oda drom, khatar džav, mange garude e pasca.

⁵ Dikh pre čači sera a dikheha, hoj ňiko mange na kamel te pomožinel. Nane man kaj te denašel, ňikaske na džal pal miro dživipen.

⁶ RAJEJA, pre tu vičinav a phenav: „Tu sal miro than, kaj man šaj garuvav, tu sal sa, so mange kampel andre kada dživipen!“

⁷ Šun miro roviben, bo som andro baro pharipen. Le man avri olendar, ko pre mande džan, bo hine zoraleder sar me.

⁸ Le man avri andral e bertena, hoj te lašarav tiro nav! O čačipnaskre pes zdžana pašal mande, bo mange presikaves o lačhipen.