Žalmi 141 - Le Devleskero Lav Andre Romaňi Čhib Slovensko 2021

O Žalmos 141

1 Le Davidoskro žalmos.

¹ Le Davidoskro žalmos. RAJEJA, ke tu vičinav! Siďar mange te pomožinel! Šun miro hangos, sar ke tu vičinav!

² Prile miri modľitba sar o kaďidlos a mire vasta, so hazdav, sar e račakri obeta.

³ RAJEJA, ačhav le stražňiken paš miro muj! Stražin o vudar mire vuštengro!

⁴ Ma domuk, hoj mange o jilo te džal pal o nalačho, hoj te kerav o nalačhipen olenca, ko oda keren, aňi hoj lenca te chav pre lengre hoscini.

⁵ Te man demela o čačipnaskro manuš – oda hin o kamiben; te man pokarhinela – oda hin sar olejos pro šero; miro šero oda prilela. Ale me man furt modľinava, hoj o nalačhe te aven marde vaš oda, so keren.

⁶ Lengre vodci ena čhide tele pal o skali, a akor o nalačhe sprindžarena, hoj mire lava sas čače.

⁷ On phenena: „Sar vareko orinel e phuv a rozmarel o hrudi, avke hine rozčhide amare kokala andro muj le Šeoloskro.“

⁸ Ale mire jakha, RAJEJA, Adonaj, dikhen pre tute, pre tute man mukav, ma de man le meribnaske!

⁹ Chraňin man le pascendar, so mange kerde, the le sitendar, so mange nacirdle o nalačhe.

¹⁰ Mi peren o nalačhe andre peskre siti, ale me len mi obdžav.