Žalmi 138 - Le Devleskero Lav Andre Romaňi Čhib Slovensko 2021

O Žalmos 138

1 Le Davidoskro.

¹ Le Davidoskro. Paľikerava tuke, RAJEJA, andral calo jilo, anglo ňeboskre bitosťi tuke giľavava o chvali.

² Visarav man ke tiro sveto Chramos, banďuvav tele a lašarav tiro nav vaš tiro baro kamiben the vernosť, bo bararďal tiro lav upral savoreste.

³ Sar ke tu vičinavas, odphenďal mange; iľal mandar e dar a diňal man zor.

⁴ RAJEJA, savore kraľa pre phuv tut lašarena, sar šunena o lava andral tiro muj.

⁵ Giľavena pal tire droma, bo le RAJESKRI slava hiňi bari.

⁶ O RAJ hino upre učes, a the avke dikhel, ko hino teledikhlo, ale le barikanes prindžarel dural.

⁷ Kajte uľomas andro pharipen, tu na domukeha, hoj te merav; nacirdeha tiro vast pre mire choľamen ňeprijaťeľa, zachraňineha man tire čače vasteha.

⁸ O RAJ dokerela sa vaš ma. RAJEJA, tiro verno kamiben ľikerel pro furt. Ma omuk e buči tire vastengri!