Žalmi 13 - Le Devleskero Lav Andre Romaňi Čhib Slovensko 2021

O Žalmos 13

¹ Oleske, ko ľidžal o bašaviben. Le Davidoskro žalmos.

² RAJEJA, mek dži kana pre ma bistereha? Pro furt? Dži kana angle ma mek garuveha tiro muj?

³ Dži kana hordinava o pharipen andre duša a džives so džives e žaľa andro jilo? Dži kana pes miro ňeprijaťeľis pre mande ľidžala upre?

⁴ Dikh pre mande, RAJEJA, a odphen mange! De švetlos mire jakhenge, hoj te na zasovav andro meriben,

⁵ hoj te na phenel miro ňeprijaťeľis: Domarďom les! A te na radisaľol, te me perava.

⁶ Ale me man mukav pre tiro verno kamiben; miro jilo radisaľol andre tiro spaseňje. Giľavava le RAJESKE, bo ov sas ke mande igen lačho.