Žalmi 112 - Le Devleskero Lav Andre Romaňi Čhib Slovensko 2021

O Žalmos 112

¹ Haleluja! Bachtalo manuš, savo pes daral le RAJESTAR a kaske hin igen pre dzeka leskre prikazi.

² Leskre čhave ena zorale pre phuv; o potomstvos le čače manušeskro ela požehňimen.

³ Andre leskro kher ela o barvaľipen a savorestar pherdo; leskro spravodľišagos ľikerela furt.

⁴ O švetlos andro kaľipen švicinela le čače manušeske, oleske, ko hino lačho, jileskro the spravodľivo.

⁵ O lačhipen avela pre oda, ko ščirones del kečeň, pre oda, ko kerel o veci čačipnaha.

⁶ O spravodľivo manuš pes šoha na čhalavela; furt les leperena.

⁷ Na predarala, sar avela e nalačhi sprava; leskro jilo hino zoralo, mukel pes pro RAJ.

⁸ Leskro jilo na izdral a na daral pes; dikhela te perel peskre ňeprijaťeľen.

⁹ Rozčhivel ščirones a del le čore manušen; leskro spravodľišagos ačhela pro furt; leskri zor pes hazdela upre andre slava.

¹⁰ O nalačho manuš oda dikhela a choľisaľola, randela le dandenca a ela zňičimen; oda, so kamen o nalačhe te kerel, našľola.