Žalmi 111 - Le Devleskero Lav Andre Romaňi Čhib Slovensko 2021

O Žalmos 111

¹ Haleluja! Paľikerav le RAJESKE andral calo jilo maškar o spravodľiva manuša, sar hine jekhetane zgele.

² Bare hine o skutki le RAJESKRE; sako, ko lenge radisaľol, kamel lenge te achaľol.

³ Bari a igen šukar hiňi leskri buči, leskro spravodľišagos ľikerela furt.

⁴ Ov kerďa, hoj pes te na bisterel pre leskre zazraki; milosťivo a jileskro hino o RAJ.

⁵ Del te chal olen, ko pes lestar daran, pre peskri zmluva šoha na bisterela.

⁶ Sikaďa o zorale skutki peskre manušenge; diňa lenge e phuv, so sas avre narodengri.

⁷ Andre savoreste, so kerel, hino verno the spravodľivo, pre savore leskre prikazi pes šaj te zmukel.

⁸ On hine zathode pro furt, hine dine le čačipnaha the le spravodľišagoha.

⁹ Cinďa avri peskre manušen, peskri zmluva zathoďa pro furt. Leskro nav hino sveto a užasno.

¹⁰ O goďaveripen chudel la sveta daraha anglo RAJ; savore, ko dživen pal leskre prikazi, hine goďaver, Leske džal e chvala pro furt.