Žalmi 107 - Le Devleskero Lav Andre Romaňi Čhib Slovensko 2021

O pandžto zvitkos le Žalmengro O Žalmos 107

¹ Paľikeren le RAJESKE, bo hino lačho, bo leskro verno kamiben ľikerel pro furt.

² Kavke mi vakeren ola, saven o RAJ cinďa avri, saven cinďa avri andral o vast le ňeprijaťeľistar,

³ saven skidňa andral o phuva le zapadostar the le vichodostar, le severostar the le juhostar.

⁴ Bludzinenas pal o thana, kaj nane ňič, the pal e pušťa a na arakhle ňisavo foros, kaj šaj bešle.

⁵ Sas bokhale the smedna; na birinenas imar te dživel.

⁶ Akor andre peskro pharipen vičinenas ko RAJ a ov len iľa avri andral o trapišagos.

⁷ Ľidžalas len rovne dromeha, hoj te doaven andro foros, kaj šaj bešle.

⁸ Mi paľikeren le RAJESKE vaš leskro verno kamiben, vaš leskre užasna skutki, so kerďa prekal o manuša,

⁹ bo le smednen del te pijel paňi a le bokhalen čaľarel le lačhe chabeneha.

¹⁰ Varesave bešenas andro kaľipen, andro nekbareder kaľipen, cerpinenas andre bertena phandle le lancenca

¹¹ vašoda, hoj pes ačhavenas le Devleskre lavenge a odčhivenas e rada le Nekbaredereskri.

¹² Pokorinďa lengre jile la phara bučaha; pele pre phuv a ňiko lenge na pomožinďa.

¹³ Akor andre peskro pharipen vičinenas ko RAJ a ov len zachraňinďa andral o trapišagos.

¹⁴ Iľa len avri andral o kaľipen, andral o nekbareder kaľipen, a čhingerďa lenge o lanci.

¹⁵ Mi paľikeren le RAJESKE vaš leskro verno kamiben, vaš leskre užasna skutki, so kerďa prekal o manuša,

¹⁶ bo phagerďa o brondzune brani a prečhinďa o trastune zavori.

¹⁷ Varesave džene ačhile sar diline vaš peskre binošna droma the vaš peskre nalačhipena.

¹⁸ Savoro chaben lenge džungľiľa a avle pašes paš o brani le meribnaskre.

¹⁹ Akor andre peskro pharipen vičinenas ko RAJ a ov len zachraňinďa andral o trapišagos.

²⁰ Bičhaďa peskro lav a sasťarďa len; zachraňinďa len le hrobostar.

²¹ Mi paľikeren le RAJESKE vaš leskro verno kamiben, vaš leskre užasna skutki, so kerďa le manušenca.

²² Mi paľikeren leske le obetenca a pal leskre skutki mi giľaven radišagoha.

²³ Varesave džene gele le loďenca pro moros, hoj ode peske te zaroden pro dživipen.

²⁴ Dikhle ode bare veci, so o RAJ kerďa; leskre užasna skutki pro baro moros.

²⁵ Phenďa lav a avľa bari burka, savi hazdľa o moroskre vlni.

²⁶ O paňi lenca čhivkerelas dži upre andro luftos, paľis dži tele andre hlbina; daranas pes la pohromatar, so pre lende avľa.

²⁷ Poddžalas lenge o pindre sar le mate manušeske; imar na džanenas so te kerel.

²⁸ Akor andre peskro pharipen vičinenas ko RAJ a ov len cirdňa avri andral o trapišagos.

²⁹ E zoraľi burka čerinďa pre loki balvajori a o vlni pro moros peske bešle tele.

³⁰ Radisaľile, hoj imar o vlni preačhile, a ov len doanďa andro pristavos.

³¹ Mi paľikeren le RAJESKE vaš leskro verno kamiben, vaš leskre užasna skutki, so kerďa le manušenca.

³² Mi bararen les maškar o manuša a mi lašaren les o phureder andre rada.

³³ Ov o paňa čerinel pre pušťa a o prameňa pre šuki phuv;

³⁴ e uľipnaskri phuv pro than, kaj na barol ňič, vaš o nalačhipen olengro, ko ode bešen.

³⁵ Ov e pušťa čerinel pro jazera a e šuki phuv pro prameňa.

³⁶ Thoďa ode te bešel le bokhale manušen a on peske ačhade foros pro dživipen.

³⁷ Sadzinde peske pro maľi, sadzinde peske o viňici a skidle upre pherdo uľipen.

³⁸ Požehňinďa len a sas len but čhave; na domukľa, hoj len te el frimeder dobitkos.

³⁹ Paľis lendar ačhiľa ča frima džene, sas pokorimen le trapišagostar, le cerpišagostar the le pharipnastar.

⁴⁰ Ov kerďa bari ladž le rajenge a diňa lenge te bludzinel pal e pušťa.

⁴¹ Ale le čores iľa avri andral leskro pharipen a leskre famelijendar kerďa ajci but sar stados le bakrengro.

⁴² Dikhena oda o spravodľiva a radisaľona, ale savore nalačhe phandena andre peskre muja.

⁴³ Oda, ko hino goďaver, mi gondoľinel pal kala veci a mi achaľol o verno kamiben le RAJESKRO!