Žalmi 105 - Le Devleskero Lav Andre Romaňi Čhib Slovensko 2021

O Žalmos 105

¹ Paľikeren le RAJESKE, bararen leskro nav! Maškar o narodi den te džanel, so kerďa!

² Giľaven leske, bašaven leske! Vakeren pal savore leskre zazraki!

³ Lašaren tumen leskre svete naveha! Mi radisaľon o jile olenge, ko roden le RAJES!

⁴ Roden le RAJES the leskri zor; ma preačhen te rodel leskro muj!

⁵ Leperen tumenge pro zazraki, pro bare veci, so kerďa, the pre oda, sar sudzinelas,

⁶ tumen, o čhave le Abrahamoskre, leskre služobňikoskre, o čhave le Jakoboskre, le Devleskre avrikidle!

⁷ Ov hin o RAJ, amaro Del, leskre sudi hine pro manuša pal caľi phuv.

⁸ Šoha na bisterel pre peskri zmluva, pre peskro lav, so diňa ezera pokoleňjenge.

⁹ Phandľa e zmluva le Abrahamoha a diňa lav le Izak,

¹⁰ le Jakoboske la kerďa sar prikazis, le Izraeloske sar e večno zmluva,

¹¹ akor, sar phenďa: „Tuke dava e kanaaňiko phuv andro ďeďictvos.“

¹² Sar mek on sas ča frima džene a sas andre odi phuv ča cudzinci,

¹³ phirenas andral jekh narodos ke aver a andral jekh kraľišagos ke aver.

¹⁴ O Del na domukľa, hoj len vareko te trapinel, vaš lende pokarhinďa the le kraľen:

¹⁵ „Ma thoven o vasta pre mire pomazimen manuša; ma dukhaven mire proroken!“

¹⁶ Sigeder sar domukľa e bokh pre phuv a iľa lendar savoro maro,

¹⁷ bičhaďa anglal lende muršes, le Jozef, savo sas bikendo otrokoske.

¹⁸ O pindre leske phandle andro kľigina, e meň leske zakerde andro trasta,

¹⁹ medik pes na ačhiľa oda lav, so phenďa anglal. O lav le RAJESKRO sikaďa, hoj les hin čačipen.

²⁰ Akor o kraľis prikazinďa, hoj les te muken, o vladcas le manušengro les oslobodzinďa.

²¹ Ačhaďa les rajeske upral peskro kher, vladcaske upral calo peskro barvaľipen,

²² hoj te prikazinel leskre rajenge, so kamel, a te del goďi leskre radcen.

²³ Paľis avľa o Izrael andro Egipt; o Jakob dživelas sar cudzincos andre phuv le Chamoskri.

²⁴ O RAJ diňa peskre manušen but čhave a kerďa lendar zoraleder lengre ňeprijaťeľendar.

²⁵ Visarďa le Egipťanenge o jile pre leskre manuša, vašoda len našťi avri ačhenas a thovenas lenca avri.

²⁶ Bičhaďa le Mojžiš, peskre služobňikos, the le Aron, saves peske kidňa avri.

²⁷ Kerenas maškar lende leskre znameňja the zazraki andre Chamoskri phuv.

²⁸ Bičhaďa o kaľipen, e phuv kaľiľa andre, ale o Egipťana the avke na šunde leskre lava.

²⁹ Čerinďa lengre paňa pro rat a kerďa, hoj o ribi te meren.

³⁰ Pherarďa e phuv but žabenca, mek the le kraľiskre khera.

³¹ Prevakerďa a avle o muchi, o komara pre caľi lengri phuv.

³² Čerinďa o brišind pro bare krupi, bičhaďa o jagale plameňa pre lengri phuv.

³³ Zňičinďa lenge o viňičis the o figi, phagerďa o stromi pre lengri phuv.

³⁴ Prikazinďa a avle o maľakre grajora, ajci kobilki, hoj pes na denas te zrachinel.

³⁵ Chale tele savore rastlini andre lengri phuv, chale tele savoro uľipen pro maľi.

³⁶ A akor andro Egipt murdarďa savoro, so uľiľa ešebno, le ešebne čhaven, save sikavenas pre lengri zor.

³⁷ Iľa avri le Izrael le rupoha the le somnakaha a savore sas saste the zorale.

³⁸ O Egipt radisaľolas, sar džanas het, bo pes lendar igen daralas.

³⁹ Nacirdňa lenge e chmara sar lepeda a rači švicinelas la jagaha.

⁴⁰ Sar žadinenas, anďa lenge prepelici; čaľarelas len mareha andral o ňebos.

⁴¹ Phundraďa e skala a avľa avri pherdo paňi, čuľalas sar e jarka pre pušťa.

⁴² Bo na bisterďa pro sveto lav, so diňa le Abraham, peskre služobňikos.

⁴³ Avke iľa avri peskre manušen radišagoha, peskre avrikidlen giľavipnaha.

⁴⁴ Diňa lenge o phuva le narodengre, ile peske o maľi, pre save aver džene kerenas buči.

⁴⁵ O RAJ oda kerďa, hoj te doľikeren leskre prikazaňja a te šunen leskre zakoni. Haleluja!